DILI, 03 Fevereiru 2026 (TATOLI)—Polisia Nasionál Timor-Leste (PNTL) kaptura ona suspeitu na’in-tolu iha área Ponte Maufelu, ne’ebé deskonfia envolve iha asaun krime hodi tuda rahun ekipamentu pezadu nia vidru husi Empreza Rubic Unipesoál, Lda, ne’ebé utiliza hodi halo alargamentu ba estrada protokulu iha área Bekora.
Komandante PNTL Munisípiu Dili, Superintendente Xefe Polisia Orlando Gomes, hateten horikalan akontese akontesmentu ida iha ponte Maufelu Bekora, joven sira tuda rahun vidru eskavator banhira motorista operatór halo servisu alargamentu ba estrada protokulu iha área Bekora.
“Motivu husi akontesimentu ne’e, tanba kondutór operator eskapatór ne’e halo servisu mak kait ba komunidade sira-nia uma balun ne’ebé besik estrada, tanba ne’e suspeitu sira lori fatuk tuda no resulta tuda rahun vidru eskavatór nian. Depois akontesementu ida-ne’e Komandu PNTL Munisípiu Dili foti kedas asaun no kaptura kedas suspeitu na’in-tolu no ita lori kedas mai iha eskudra Kristu Rei hodi halo indetifikasaun ba kazu refere,” Orlando Gomes hateten ba jornalista sira hafoin partisipa iha inauguransaun kampu sport training Centre iha Bekora, ohin.
Nia hateten, iha prosesu indetifikasaun ne’e iha arguidu na’in-rua mak konstitui ba arguidu no detein iha oras 72 hodi kontinua prosesu ba Minsitériu Publiku no suspeitu na’in-ida (1) mak liberta fali tanba la envolve iha kazu refere.
“Suspeitu na’in-tolu ne’e ho naran inisiál AJ, SE no seluk ne’e ha’u la lembra ona. Suspeitu sira-ne’e hela duni iha área ponte Maufelu Bekora. Klaru katak banhira ita tuda ona vidru rahun ne’e krime tenke halo prosesu. Tanba ne’e ami foti kedas asaun hodi kaptura no halo prosesu indetifikasaun no detein 72 oras hodi aprezenta ba Ministériu Públiku,” nia dehan.
Nia afirma, PNTL ne’e halo seguransa ba ema hotu, la’ós halo seguransa de’it ba SEATOU maibé inklui mós halo seguransa ba komunidade vitima ba alargamentu estrada Bekora.
“Ita iha ekipa ida atu hamutuk ho SEATOU. Signifika prezensa Polisia nian atu asegura ba iha sé deit. Ita fó seguransa ba SEATOU banhira halo atividade alargamentu estrada no ita mós fó seguransa ba ita sidadaun sira afetadu, atu nune’e labele mosu dezentementu ruma ka halo prevesaun ka labele mosu krime ruma iha ne’eba,” nia esplika.
Nia dehan, objetivu husi prezensa polisia nian atu asegura para alargamentu estrada ne’e bele kontinua la’o nafatin ba oin.
Antes ne’e, Pajina ofisial husi Xanana ba ema hotu fó sai katak Primeiru-Ministru (PM), Kay Rala Xanana Gusmão husu Komandu Polísia Nasionál Timor-Leste (PNTL) atu prosesa lalais autór sira-ne’e hodi hatene loloos kronolojia ho motivu no tenke responsabiliza asaun ne’ebé sira komete.
“Ita husu ba PNTL atu buka tuir autór sira, tanba hahalok hanesan ne’e la kontribui ba desnvolvimentu ba rai no nasaun ida-ne’e,” PM Xanana hateten.
Enkuantu IX Governu Konstitusionál halo alargamentu ba estrada Bekora ho objetivu prinsipál atu redús engarrafamentu no hamenus problema tráfiku, tanba Bekora hanesan área ho movimentu transporte públiku aas tebes.
Aleinde ne’e, atu hasa’e seguransa ba motorista, ema la’o ain, aumenta kapasidade estrada atu bele simu transporte públiku barak-liu inklui hadi’a drainajen hodi evita inundasaun iha tempu udan, apoia dezenvolvimentu ekonómiku lokál tanba fásil-liu atu assesu bá merkadu, eskola no servisu.
Jornalista : Felicidadade Ximenes
Editór : Cancio Ximenes
