BOBONARU, 03 Fevreiru 2026 (TATOLI) – Ekipa husi Sentru Saúde Komunitáriu (SSK) Maliana hamutuk ho Diresaun Servisu Munisipál Saúde Munisípiu Bobonaru halo ona intervensaun ba área rizku ba moras dengue, hodi halo fumigasaun no fahe abate atu hamate populasaun susuk Aedes Aegypti ka Aedes albopictus.
Xefe SSK Maliana, Nascimento Mau Leto, hateten medida preventiva seluk ne’ebé daudaun la’o hela mak halo promosaun saúde, liuhusi Programa Integradu Saúde (PIS) iha suku.
“Ohin, grupu boot ida bá halo PIS iha Holsa, haruka sira tama-sai uma, fahe Abate, halo promosaun saúde, Haree mós kondisaun uma, bee-nalihun, hamoos vazu ai-fuan para susuk labele moris”, nia hateten ba Tatoli, ohin.
Dirijente ne’e husu ba komunidade atu koopera ho ekipa Saúde hodi halo prevensaun ho maneira rasik hanesan toba iha moskiteireu laran, kose Autan no hasai bee-nalihun iha vaz ai-funan, roda, lata mamuk no seluk tan.
Xefe suku Holsa, António Santa Cruz, afirma nia parte orienta ona membru konsellu suku atu organiza komunidade halo limpeza jerál iha bairu no idaidak nia uma-ninin hodi apoia halo prevensaun ba moras ne’e.
“Suku Holsa mós parte ida rizku ba moras dengue. Moras ne’e mosu, parte ida ita-nia komunidade nia konxiénsia ladún, tanba ita haree tempu atividade PIS halo kada fulan sira-nia prezensa la másima”, nia lamenta.
Tuir dadus husi Diresaun Servisu Munisipál Saúde Munisípiu Bobonaru, iha Janeiru ne’e rejista kazu Dengue 16, ne’ebé kompostu husi Balibó, Bobonaru, Kailaku rejista kada ida, no Maliana 13. Moras ne’e afeta barak liu ba labarik ho idade tinan 15 mai kraik.
Notísia relevante:
Jornalista: Sergio da Cruz
Editora: Maria Auxiliadora
