DILI, 04 Fevereiru2026 (TATOLI)–Komandu Polísia Nasionál Timor-Leste (PNTL) hamutuk Ministériu Interiór (MI) no Sekretaria Estadu Terra no Propriedade (SETP), Kuarta ne’e, realiza enkontru konjunta hodi diskute kona-ba atribuisaun rai ba Komandu hodi halo konstrusaun ba infraestrutura polísiál iha tinan oin.
Infrastrutura polísiál ne’ebé mak sei harii mak hanesan Komandu Munisípiu 14, Eskuadra hamutuk 50, kazerna 65 inklui postu polísia.
“Ita halo enkotru ho ekipa ténika husi Ministériu Interiór no Terra no Propriedade atu halo levantamentu ba rai hodi haree katak, medida rai ne’e sufisiente ka lae hodi halo konstrusaun, buat balu sira halo ona, ita presiza uniformiza no ita mos presiza haree no identifika keta fatin balun iha problema karik, depois ita halo kedas koordenasaun ho Terra no Propriedades atu nune’e bele hetan solusaun,” Komandante Jerál PNTL, Komisáriu Jerál Polísia Henrique da Costa, hato’o ba Jornalista sira hafoin enkontru iha Sentru Formasaun Polísia Komoro, Kuarta ne’e.
Notísia relevante : Governu konklui levantamentu ba konstrusaun infraestrutura polisiál
Komisáriu Jerál PNTL husu ba Komandante munisípiu no unidade sira atu ajuda ekipa liña ministeriál halo identifikasaun iha terrenu ba konstrusaun infraestrtura polísiál nune’e tenke pasa ba relatóriu hodi Komandu kontinua prienxe iha planeamentu hodi entrega ba Governu.
“Ita haree serbisu balun la’o ona, ezemplu hanesan Eskuadra sira iha Loré no Hatulia, balun prosesu la’o hela. Espera katak, iha tinan 2026 ne’e sira seluk tantu Komandu munisipál sira hahú bele hotu,” nia akresenta.
Iha fatin hanesan, Xefe Unidade Apoiu Tékniku husi MI, Adino Soares Amaral, PNTL mak sai na’in ba projetu enkuantu MI mak sai implementadór iha projetu.
Daudaun ne’e iha ona Eskuadra hamutuk 15, nune’e Governu planeia atu harii tan balun kompleta Eskuadra 65.
Konstrusaun Eskuadra iha Dili hanesan área risto Rei, Na’in-Feto no Vera Cruz ne’e ho tipu A.
“Ministériu Interiór nia serbisu mak hahú muda projetu kazerna husi postu mai munisípiu, pois mai nasionál. Entaun, hadi’a husi kraik mak sae mai, tanba projetu ne’e ba atendimentu públiku iha terrenu, entaun kazerna agora ne’e tolu iha ona, falta restu atu kompleta,” nia akresenta.
Osan atu harii infraestrutura polisiál ne’e prevee ona iha Konsellu Administrasaun Fundu Infraestrutura.
“Kona-ba bairru polísia V Governu halo ona, agora ami atu halo levantamentu ba reabilitasaun ba uma no tau kama, kulsaun sira atu sira (membru polísia) bá tama de’it, uluk sira la tau kama no kulsaun,” nia tenik.
Jornalista : Natalino Costa
Editora : Julia Chatarina
