VIKEKE, 04 Fevereiru 2026 (TATOLI)—Koordenadór Sentru Saúde Internamentu Munisípiu Vikeke, Francisco da Costa, informa mákina marka CELL-DYN Emerald 2 kana-ba teste raan kompletu nian iha Sentru Saúde Internamentu (SSI) Munisípiu Vikeke avaria kuaze fulan ida resin ona, maibé nasionál seidauk mai halo manutensaun.
“Iha sentru internamentu ne’e ita iha mákina teste raan kompletu ida, maibé agora aat fulan ida resin ona. Nune’e, kazu grave sira hanesan presiza teste raan tenke lori bá Baukau hodi halo teste raan kompletu iha-ne’ebá. Ida-ne’e sai hanesan dezafiu ida ba ami,” Francisco ba TATOLI iha Sentru Saúde Internamentu Vikeke, Kuarta ne’e.
Problema ida-ne’e, nia haktuir, parte laboratóriu SSI relata ona bá servisu saúde munisípiu maibé to’o agora seidauk halo manutensaun ba mákina ne’e.
Iha fatin hanesan, Responsavel Laboratóriu SSI Vikeke, Sergio Henrique de Deus, haktuir mákina teste raan kompoletu marka CELL-DYN Emerald 22 aat, depoiz avaria sira hato’o ona pedidu ba laboratórium nasionál atu hadi’a.
“Ami simu fali informasaun husi laboratóriu nasionál katak tenke haruka transporte bá Dili hodi tula tékniku mak foin bele hadi’a. Tan ne’e mak to’o agora seidauk hadi’a, maibé ami kontinua tenta atu hadi’a tanba ita-nia komunidade barak mak presiza teste raan kompletu,” nia hato’o.
Nia esplika mákina teste raan ne’e avaria iha parte raning sampel raan nian, iha momentu ne’ebá pesoál analista ida mak halo teste hela ba raan derepente de’it avaria.
Iha fatin hanesan, Xefe Sentru Saúde Internamentu Munisípiu Vikeke, João Corte-Real, hateten kona-ba kondisaun mákina ne’e, sira relata ona bá laboratóriu nasionál atu hadi’a, ne’ebé hein de’it tékniku husi nasionál.
Jornalista: Vitorino Lopes da Costa
Editór: Xisto Freitas da Piedade
