DILI, 04 Fevereiru 2026 (TATOLI)—Ministériu Interiór (MI) fó tempu loron 10 ba aplikante rekrutamentu membru PNTL foun 2025 atu fó kontestasaun no lamentasaun.
“10 dias mak ita haree. Prosesu ne’e la’o normál, tanba ne’e mak Komisaun halo monitorizasaun, fiskalizasaun no verifikasaun hafoin halo relatóriu no fó hatene mai dehan katak falta oituan, ita haree hodi hadi’a tutuir,” Ministru Interiór, Francisco da Costa Guterres, hateten ba Jornalista sira hafoin ramata reuniaun Konsellu Ministru iha Palásiu Governu, Kuarta ne’e.
Nia konsidera, bainhira iha aplikante balun husi aplikante admitidu ne’ebé mak la kontente ho rezultadu ne’ebé fó sai ne’e normál.
“Ita labele foti hotu sira. Entaun ita tenke halo ida-ne’e. Iha ne’ebé de’it, iha mundu ne’e ita halo desizaun ita foti sira laiha, sempre iha ida rua ke ladún konkorda no la kontente ho ita, maibé ita hadi’a,” nia akresenta.
Notísia relevante : Komisaun Rekrutamentu fó sai rezultadu vaga PNTL iha Janeiru 2026
Governante ne’e defende, rekrutamentu ne’e la falla totál maibé Komisaun hakarak akumulativu.
“Ita labele elemina ema parte ida de’it. Rekrutamentu ne’e ita labele haree ema-nia kapasidade, parte ida karik nia halai ladún, maibé parte seluk nia bele, entaun ida-ne’e mak ita hakarak. Tanba ne’e, ita implementa kritériu haat iha rekrutamentu hafoin ita soma sira-nia valór haat ne’e hamutuk mak fó sai dala-ida,” nia informa.
Nia lembra, iha teste dala barak hetan ema di’ak, maibé ita tenke soe nia iha klaran tanba falla kiikoan oan ida de’it, entaun rekrutamentu ne’e buka akumulativu ne’e atu rezolve problema.
Ministru Interiór dehan, laiha ona oportunidade ba ema 10.000-resin. “Sira ne’e la submete ba teste médiku tanba sira ne’e valór mak nune’e.”
Governu foti kandidatu 400 ba uluk halo teste médiku dahuluk atu sira bele halo ona formasaun.
Governante ne’e esplika, bainhira sira ne’ebé mak husi 400 ne’e la pasa mak sei foti fali husi númeru ordináriu 400.
“Teste husi kandidatu na’in-400 Governu sei haree hodi halo desizaun ruma, kuandu iha posibilidade ruma ita bele avansa ho sira,” nia tenik.
Ministru hatutan, kona-ba regra polísia no veteranu nia oan iha kuota ba vaga ne’e, parte Komisaun rasik hasai ona tanba Tribunál konsidera inkonstitusionál.
Aleinde ne’e, Ministru Interiór rasik hato’o ona ba Primeiru-Ministru, Kay Rala Xanana Gusmão.
“Ohin ha’u hato’o ona ba iha Konsellu Ministru, no Primeiru Ministru Xanana Gusmao nia hatene tiha ona rezultadu, Primeiru Ministru dehan sim, la’o nafatin, desizaun ne’ebé foti ona bele la’o,” nia informa.
Ministru dehan, karik iha rekrutamentu ne’e mak identifika katak iha ofisiál nia oan barak no hetan reklamasaun ruma kona-ba asuntu ne’e maka nia sei foti asaun konkreta.
“Ha’u hetan nia atu ofisiál no superiór nian oan, ha’u hasai kedan nia husi lista rekrutamentu ne’e, ha’u la halimar,” nia afirma.
Ministru konsidera rekrutamentu ba membru PNTL foun 2025 ne’e impasiál.
“Imi dehan rekrutamentu ne’e la imparsiál ne’e ha’u la fiar, tanba komisaun rekrutamentu ne’e envolve husi ekipa verifikasaun husi Palásiu Prezidensiál no Parlamentu, husi Deputadu Bankada Governu no Oposizaun inklui sosiedade sivil no sira rekomenda mai ha’u katak prosesu ne’e imparsiál no transparente. Se la transparente ne’e imi mak dehan,” nia katak.
Jornalista : Natalino Costa
Editora : Julia Chatarina
