BOBONARU, 04 Fevereiru 2026 (TATOLI) – Prezidénsia Repúblika disponibiliza mobiliáriu dormitóriu ba Orfonatu Uma Esperansa, ne’ebé lokaliza iha aldeia Oplegul, suku Holsa, postu administrativu Maliana, munisípiu Bobonaru, ne’ebé jere husi madre sira iha kongregasaun komunidade Servarum do Espírito Santo (SSPS).
Mobiliáriu dormitóriu ne’ebé apoia ba orfonatu ne’e mak hanesan esponza, sumasu no kolsa kama nian, kolxaun no seluk tan.
Asesór Sosiedade Sivíl Prezidénsia Repúblika, Quintiliano Moniz, hateten katak tulun ne’e bazeia bá vizita husi Prezidente Repúblika, José Ramos-Horta, iha semana rua liubá, ne’ebé observa direita kondisaun dormitóriu orfonatu ne’e katak laiha kolxaun, sumasu no froña sira.
Notísia relevante: Espoza PR apoia nesesidade bázika ba SSPS Maliana
“Prezidente Repúblika konsidera katak situasaun ne’e urjente, tanba sira iha kama, maibé laiha kolxaun. Tanba ne’e, ohin Presidénsia mai apoia sasán no sei haree tan nesesidade seluk iha futuru”, Quintiliano Moniz dehan.
Apoiu husi Prezidente Repúblika ne’e la’ós ba de’it orfonatu Uma Esperansa, maibé ba mós orfonatu sira hotu iha territoriu ne’ebé iha situasaun kbiit natoon.”Apoiu ne’e mós la’ós atu foti funsaun Governu, maibé atu kompleta servisu ne’ebé seidauk bele responde ho di’ak. Prezidente Repúblika mós hato’o mensajen ba labarik orfan sira atu nafatin iha korajen hasoru difikuldade no rona orientasaun husi madre sira, no garante katak Presidénsia sei tau-matan nafatin”, nia salienta.
Sekretáriu Autoridade Munisípiu Bobonaru ba Asuntu Administrasaun no Finansa, Domingos da Costa, agradese ba Prezidente Repúblika tanba fó ona apoia ba Orfonatu Uma Esperansa.
Nia rekoñese durante ne’e Autoridade Munisípiu Bobonaru haree hela difikuldade ne’ebé orfonatu ne’e enfrenta, maibé labele fó apoiu tanba laiha forsa.
“Atu ajuda ne’e ita-nia Sentru Solidariedade Sosiál nia kompeténsia. Ami iha diresaun asaun sosiál munisípiu, maibé ami tau pplanu orsamentu ne’e ba iha nesesidade diresaun nia de’it. Ami labele tau osan halo serbisu ida MSS nian, tanba matadalan la fó. Ami buka esforsu atu ajuda orfonatu sira, maibé forsa no kapasidade la to’o”, nia salienta.
Responsavel Orfonatu Uma Esperansa, Madre Aurélia Amélia Rosa da Costa, agradese ba Xefe Estadu ne’ebé ho laran-luak rona no responde ba orfan sira iha Uma Esperansa nia halerik.
“Orfonatu Uma Esperansa sei uza fasilidade sira ne’ebé iha hodi hasa’e prosesu aprendizajen labarik sira iha área edukasaun no dezenvolvimentu koñesimentu”, dehan.
Orfonatu Uma Esperansa akomoda labarik na’in-20, inklui labarik sira ne’ebé mai aprende suku.
Tuir planu, sei loke tan kursu língua-portugeza, ingleza, inklui kursu komputadór bainhira hetan apoiu ekipamentu informátiku husi Prezidénsia Republika.
Notísia relevante: Ramos-Horta apresia kualidade aprendizajen Eskola Koléjiu Maliana
Jornalista: Sergio da Cruz
Editora: Maria Auxiliadora
