DILI, 04 Fevereiru 2026 (TATOLI)—Prezidente Repúblika, José Ramos-Horta, iha Abu Dhabi kuarta (04/02) ne’e, hasoru malu ho Juiz Mohamed Abdelsalam, Sekretáriu Jerál ba Prémiu Zayed ba Fraternidade Umana no Embaixador UAE Abdullah Al Dhaheri, hodi diskute misaun globál ne’ebé la’o hela hodi hametin dame no komprensaun mútua.
Iha sorumutu ne’e, Juiz Abdelsalam hato’o Papa Francisco nia domin boot ba Timor-Leste, hodi nota katak Santu Padre kontinua fó valór aas ba nasaun ne’e hafoin ninia interese misionáriu sira iha rejiaun ne’e hodi ko’alia kona-ba atividade boot rua iha Timor-Leste: Harii rezidénsia ba labarik feto sira ne’ebé UAE mak fó doasaun, no mós prepara ba abertura Embaixada permanente UAE nian iha Timor-Leste.
Sekretáriu Jerál mós louva Prezidente Ramos-Horta nu’udar kampeaun pás nian ne’ebé firme, hodi hatudu ninia orgullu boot ba Prezidente nia envolvimentu kontínua iha inisiativa internasionál Fraternidade Umana nian no ninia kompromisu ne’ebé metin ba prinsípiu umanitáriu sira.
Tuir nota ne’ebé TATOLI asesu huisi media Palásiu Prezidensiál hateten, Juiz Abdelsalam fahe mós ninia diskusaun foin lalais ne’e ho Prezidente Azerbaijão, ne’ebé nia enkoraja tebes atu vizita Timor-Leste, hodi deklara katak ne’e mak nasaun ida-ne’ebé interesante liu (exciting) iha Sudeste Aziátiku.
Alende ne’e, Sekretáriu Jerál husu ba Prezidente atu ko’alia mós kona-ba importánsia relasaun globál ne’ebé konstrutivu durante ninia sesaun sira ne’ebé sei mai, hodi foti susesu Emiradu Árabe Unidu nian nu’udar modelu dezenvolvimentu ne’ebé fustera kooperasaun internasionál.
Prezidente Ramos-Horta estende konvite formál ida ba Juiz Abdelsalam atu vizita Timor-Leste iha loron 20 Agostu 2026.
Vizita ne’e planeia ona atu koinside ho eventu boot ida ne’ebé Prezidente sei hala’o ho Laureadu Nobel sira seluk, ho objetivu atu promove liután valór sira husi Dokumentu kona-ba Fraternidade Umana. Sekretáriu Jerál simu kedas konvite ne’e no reafirma ninia kompromisu hodi apoia Timor-Leste nia papél pioneiru nu’udar advogadu globál ba kompaixaun, diálogu, no solidariedade internasionál.
TATOLI
