DILI, 05 Fevereiru 2026 (TATOLI)—Autoridade Munisipál Baukau klarifika publikasaun karta husi Serbisu Munisipál Edukasaun Baukau (SMEB) ho konteúdu orienta estudante partisipa iha serimónia lansamentu hatuur fatuk dahuluk projeitu reabilitasaun estrada urbana ne’ebé sei hala’o iha Sesta (06/02/2026).
Liuhusi komunikadu imprensa ne’ebé TAtoli asesu, Kinta ne’e, AMB relata karta referida fó orientasaun atu mobiliza estudante sira hodi partisipa iha serimónia lansamentu estrada urbana iha Baucau Vila ne’ebé hamosu preokupasaun públiku iha rede sosiál.
Tuir nota komunikadu ne’e katak iha duni orientasaun eskrita ba SMEB atu mobiliza estudante sira atu partisipa iha eventu refere maibé iha iha fraze balun husi karta orientasaun referida konsiderada sala “Lapsu Calami” bainhira prepara ofísiu ne’e.
Aleinde ne’e, Autoridade Munisipál Baucau konfirma katak erru iha ofísiu ne’e laiha intensaun konsentimentu iha preparasaun redasaun.
“Autoridade hakarak mós hato’o deskulpa ba erru tékniku ne’ebé akontese ona no konfirma katak laiha intensaun planeadu iha preparasaun redasaun,” komunikadu ne’e haktuir.
AMB haloos konteúdu husi karta orientasaun atu mobiliza estudante sira maibé lahó intensaun atu estudante sira husik hela aula, más atu posibiliza biban partisipasaun haktuir ba oráriu aprendizajen ne’ebé labele perturba prosesu aprendizajen.
AMB husu ba públiku atu para ona fahe ka divulga postajen no informasaun ne’ebé la verifikadu iha mídia sosiál, inklui lalika fiar informasaun falsa ne’ebé lansa iha públiku tanba konsidera halo defamasaun ka estraga integridade pesoál iha públiku.
“Autoridade enkoraja sidadaun hotu-hotu atu asesu ba informasaun husi fonte kredivel no ofisiál sira-ne’ebé kontribui ba valór pozitivu ba ita idaidak nia-an hodi apoiu ba dezenvolvimentu nasionál,” AMB relata.
Entretantu, karta orientasaun ne’ebé husi AMB ba SMEB fó-sai iha Tersa (03/02/2026) ne’ebé husu Diretór Serbisu Munisipál Edukasaun Baukau, Afonso dos Santos da Costa atu mobiliza estudante iha Baukau Vila husi ensinu báziku, sekundária to’o ensinu superiór atu sai sasin hodi partisipa iha eventu serimónia lansamentu fatuk dahuluk ba projetu reabilitasaun estrada urbana ne’ebé sei realiza iha Vila Antiga.
Jornalista: Natalino Belo
Editór: Xisto Freitas da Piedade
