VIKEKE, 05 Fevereiru 2026 (TATOLI)—Diretór Sekretariadu Tékniku Administrasaun Eleitorál (STAE) Munisípiu Vikeke, Humberto Fernandes informa STAE Munisípiu Vikeke prodús ona populasaun nia kartaun eleitorál ba biométriku hamutuk 17.360 kompostu husi feto hamutuk 8.588 no mane 8.772.
Nia hatutan eleitór sira-ne’ebé atualiza kartaun semi-biométriku ba iha kartaun biométriku hamutuk 15.262, feto 7.541 no mane 7.721.
“Eleitór sira-ne’ebé seidauk mai atualiza kartaun eleitorál tuan ba iha biométriku hamutuk 45.453 kompostu husi feto 22.202 no mane 23.251,” Humberto ba TATOLI iha ninia knaar fatin, Vikeke Vila, Kinta ne’e.
Nia informa katak iha tinan ida-ne’e (2026), STAE nasionál iha ona planu halo rekrutamentu ba funsionáriu kontratadu sira hodi destaka ba postu sira hodi fó atendimentu ba eleitór sira-ne’ebé seidauk iha kartaun biométriku.
Kona-ba atendimentu kartaun biométriku, Humberto esplika, daudaun ne’e pesoál tékniku hamutuk na’in-haat (4) mak fó atendimentu ba eleitór sira no superviziona husi Komisaun Nasionál Eleisaun (CNE-sigla portugeza) Munisípiu Vikeke.
Konstituisaun RDTL iha artigu 65, pontu 2 dehan resenseamentu ne’e obrigatóriu, ofísiu no universál ne’ebé sei atualiza kada eleisaun. Ho baze ida-ne’e maka iha 2004, Governu liuhusi STAE halo resenseamantu eleitorál.
Jornalista: Vitorino Lopes da Costa
Editór: Xisto Freitas da Piedade
