DILI, 05 Fevereiru 2026 (TATOLI)–Diretór Kompra Institutu Nasional Farmasia no Produtu Médiku, Sergio Belo, hateten estoke ai-moruk anti raiva sufisiente atu atende ba pasiente iha munisipiu sira-ne’ebé mak asu tata.
“Atualmente ita nia estoke ai-moruk anti raiva sufisiente hela atu atende ba kazu asu tata ema iha munisípiu sira,” Sergio Belo informa ba jornalista sira iha INFPM, ohin.
Antes ne’e, Prezidente Institutu Nasionál Saúde Públika Timor-Leste Nivio Sarmento, informa Ministeriu Saude (MS), rejista ema mate ba raiva 24 iha tinan 2024 to’o 2026 nia laran.
“Fulan Janeiru tinan 2024 to’o Janeiru 2026 rejistu pasiente ne’ebé mak asu tata hamutuk rihun 6.100 husi númeru ne’e na’in-24 ho sitoma raiva to’o ikus lakon vida,” Nivio Sarmento dehan.
Nia esplika, kazu rua foun ne’ebé mak rejistu iha fulan janeiru tinan 2026 ne’e mai husi Munisípiu Likisá no Ainaru.
Agora Programa sira-ne’e liuhusi intervensaun no halo vasinasaun masal ba animál liuliu asu nian ne’e la’o nafatin, tanba ne’e progama sira-ne’e no intervensaun maka’as liu tenke mai husu Ministériu Agrikultura Peska, Pekuária no Floresta liuhusi Diresaun Nasionál Pekuária nian.
“Sira mak servisu maka’as tebes, intervensaun liña primeiru mak mai duni husi Diresaun Nasionál Pekuária, ita husi saúde ema liuhusi Ministériu Saúde rasik, prepara ai-moruk liu husik INFPM. Bainhira kazu ne’e mai duni fó vasina atu nune’e bele prevene, tanba iha kazu balun asu tata tiha lakohi relata no lakohi hakbesik fasilidade saúde. Bainhira asu tata tiha, hanoin ne’e buat ida ne’e hanesan baibain ida,” nia informa.
Tanba ne’e, Ministériu Saúde nafatin alastra ba komunidade atu kontinua halo vasina ba asu sira-ne’ebe asu ne’ebe seidauk hetan vasina raiva.
Jornalista : Felicidade Ximenes
Editór : Cancio Ximenes
