DILI, 05 Fevereiru 2026 (TATOLI) – Institutu Jeosiénsia Timor-Leste (IGTL, sigla portugés) presiza halo uluk análize ba fatuk ne’ebé komunidade deskobre iha aldeia Dauboruha, suku Uabubu, postu administrativu Ossú, munisípiu Vikeke.
Prezidente IGTL, Job Brites, dehan atu hatene fatuk ne’e tama tipu minerál ida-ne’ebé, sira-nia parte kontaktu ona komunidade iha área ne’ebá atu lori fatuk ne’e bá halo análize iha IGTL.
“Ha’u rona no haree ona informasaun husi mídia sosiál facebook, komunidade Ossú hetan fatuk ne’e. Ha’u haree kór-metan uitoan, maibé susar ami halo identifikasaun husi foto de’it. Tama tipu minerál saida?”, Job Brites dehan ba Tatoli, ohin.
Tanba ne’e, presiza halo análize no estudu kle’an, tanba daudaun ekipa IGTL mós halo hela estudu kona-ba rekursu minerál iha área referidu. “Presiza halo konfirmasaun didi’ak lai, nune’e fatuk ne’ebé komunidade hetan ne’e hola parte iha IGTL halo estudu ne’e, ne’ebé hein ekipa sei konfirma”, katak.
Nia relata katak parte IGTL no Autoridade Nasionál Mineiru no Autoridade Nasionál Petróleu antes ne’e halo ona sosializasaun ba komunidade iha área Vikeke kona-ba tipu fatuk potensiál sira ne’e, no prodús ona mapeamentu kona-ba rekursu minerál.
Iha sorin seluk, Xefe Suku Uabubu, postu administrativu Ossú, munisípiu Vikeke, Jacinto Ximenes, dehan komunidade hetan fatuk ne’ebé konsidera hanesan karvaun ka batu bara ne’e bainhira rezidente husi aldeia Dauborubaha hakarak loke dalan ba sira-nia hela fatin ho uza eskavadora.
Nia parte mós admite katak hetan ona kontaktu husi Autoridade Nasionál Petróleu atu foti amostra fatuk ne’e bá halo teste.
Jornalista: Arminda Fonseca
Editora: Maria Auxiliadora
