DILI, 05 Fevereiru 2026 (TATOLI)—Ministériu Obra Públika (MOP) tinan-ne’e sei reabilita estrada rurál hamutuk pakote ualu (8) iha Munisípiu Baukau.
Diretór Serbisu Munisipál Obra Públika (SMOP) Baukau, Agostinho Ximenes esplika MOP aprova ona projetu reabilitasaun estrada rurál hamutuk pakote ualu ho totál kilómetru 20.7 ne’ebé sei implementa iha postu administrativu haat hanesan Baukau Vila, Kelikai, Matebian no Laga.
“Estrada hirak-ne’e kuandu finaliza, bele ajuda ona ita-nia komunidade ne’ebé iha produtu lokál no kondisaun emerjénsia, tanba antes ne’e sira halerik ba estrada,” Agostinho Ximenes hateten iha Vila Nova, Kinta ne’e.
Agostinho relata, husi pakote 8 referidu, pakote dahuluk hamutuk kilómetru tolu sei implementa iha Suku Seisál diresaun estrada nasionál ba Age, Postu Baukau Vila, Pakote daruak no datoluk hamutuk kilómetru lima sei implementa iha Postu Kelikai diresaun husi Lawaliu to’o Suku Makalaku.
Pakote dahaat to’o daneen kilómetru 7.25 implementa iha Postu Kelikai diresaun Lakuliu, Lakudala to’o Uaibitai, pakote dahitu iha Postu Matebian diresaun husi Laisorulai ba Suku Maluru hamutuk kilómetru 2.6 no pakote ikus iha Postu Laga husi Atelari ba Borudua hamutuk kilómetru 2.8.
“Sei hein dezisaun, tanba foin faze avaliasaun iha aprovizionamentu,” Agostinho informa.
Nia akresenta bainhira hahú implementa sei tuir padraun estrada rurál hanesan cor simenti, ho diferente tipu hanesan pakote neen (6) sei reabilita ho tipu planu konkreta no pakote rua (2) sei reabilita ho tipu fiber konkreta.
Entretantu, totál estrada rurál iha Munisípiu Baukau hamutuk kilómetru 474 kompostu husi kilómetru 212-resin mak reabilita ona no 260 mak presiza atensaun hosi Governu.
Jornalista: Natalino Belo
Editór: Xisto Freitas da Piedade
