BAUKAU, 05 Janeiru 2026 (TATOLI)—Serbisu Munisipál Saúde Baukau (SMS) halo ona fumigasaun hodi prevene moras dengue ba uma-kain hamutuk 1.004 iha Munisípiu Baukau.
Tuir dadus ne’ebé TATOLI asesu, husi totál uma-ka’in 1.004 ne’e, SMSB halo prevensaun ho métodu rua hanesan distribui abate ba komunidade hamutuk uma-ka’in 400 iha postu administrativu haat, suku 16, aldeia 17 ho totál populasaun hamutuk 1.763 iha territóriu Munisípiu Baukau.
Xefe Departamentu Programa Saúde SMSB, Maria Cândida dos Reis esplika fomigasaun nu’udár parte husi métodu kontrolu ba vektór hanesan susuk ne’ebé kauza ba dengue nune’e prevene komunidade husi ameasa moras dengue.
“Husi kazu ne’ebé deteta ita halo ona prevensaun,” Xefe Departamentu Programa Saúde SMSB hateten iha ninia kna’ar fatin, Vila Antiga, Kinta ne’e.
Nia relata SMSB aplika métodu prevensaun dahuluk distribui abate ba komunidade antes udan monu-rai, enkuantu deside halo fumigasaun bainhira deteta ona kazu pozitivu liuliu ba uma komunidade ne’ebé iha dengue tanba prevene hamosu rezisténsia ba susuk kauza husi ai-moruk malateu bainhira halo fumigasaun.
Dadus SMSB haktuir postu administrativu neen hanesan Baukau Vila hamutuk suku no aldeia hitu, uma-kain 219 iha-ne’ebé deteta larva hodi fahe abate no halo fumigasaun ba uma-kain 203, Postu Venilale hamutuk suku no aldeia lima, uma-kain 397 iha-ne’ebé deteta larva uma-kain 95 hodi fahe abate no halo fumigasaun ba uma-kain 397.
Enkuantu, Postu Vemase hamutuk suku tolu no aldeia haat, uma-kain 180 iha-ne’ebé deteta larva uma-kain 159 hodi fahe abate no halo fumigasaun ba uma-kain 139 no postu Kelikai hamutuk suku no aldeia ida ho uma-kain 47 ne’ebé hetan ai-moruk abate no halo fumigasaun hamutuk uma-kain 47.
“Maioria komunidade ladún iha konxiénsia atu hamoos ambiente entaun kauza ba hamosu kazu dengue,” Maria dos Reis akresenta.
Entretantu, SMS Baukau durante fulan-Janeiru rejista kazu dengue hamutuk na’in-43 kompostu feto 14 no mane 29 ne’ebé rejistadu iha sentru saúde hitu kompostu husi Baguia 1, Laga 1, Kelikai 2, Venilale 13, Vemasse 4, Ossokeli 11 no Uailili hamutuk kazu 11.
Jornalista: Natalino Belo
Editór: Xisto Freitas da Piedade
