DILI, 06 Fevereiru 2026 (TATOLI)—Fórum Organizasaun Naun Govermentál Timor-Leste (FONGTIL) husu ba Ministériu Interiór (MI) atu anula desizaun ba publikasaun naran ba aplikante vaga ba membru Polísia Nasionál Timor-Leste (PNTL) foun tanba hamosu konfuzaun iha públiku.
“Husu ba Ministériu Interiór no PNTL atu imediatamente anula dezisaun, hodi la fó de’it teste médiku ba kandidatu 400, maibé fó oportunidade ba kandidata sira ne’ebé ho kategoria aprovadu, ho nune’e la hamosu diskriminasaun iha prosesu rekrutamentu,” Diretór Ezekutivu FONGTIL, Incêncio Xavier, hato’o ba Jornalista sira liuhusi konferénsia imprensa iha edifísiu FONGTIL, Kaikoli,Sesta ne’e.
Nia dehan, FONGTIL hanesan komponente ida husi organizasaun sosiedade sivil iha Timor-Leste ne’ebé iha knaar no responsabilidade iha prosesu konstrusaun Estadu, konsolidasaun ba demokrasia iha Timor-Leste liuhusi mandatu haat mak hanesan dezaminasaun informasaun, koordenasaun, empoderamentu ba membru no advokasia.
Nune’e, FONGTIL husu Governu liuhusi MI no Komandu PNTL atu halo esklaresimentu prosesu rekrutamentu ba membru foun PNTL iha tinan 2025, timoroan barak mak konkorre iha rekrutamentu referidu no tuir hotu prosesu sira hanesan teste eskrita no fíziku liuhusi regulamentu ne’ebé estabelese husi Komisaun Rekrutamentu ho baze ba Diploma Ministeriál nú.17/2025 25 Juñu kona-ba Regulamento do Concurso Público de Admissão ao Curso de Formação de Agentes da Polícia Nacional de Timor Leste.
“Husu ba Ministériu Interiór no PNTL atu halo esklaresimentu kona-ba prosesu rekrutamentu kadetes foun,” nia akresenta.
Notísia relevante : Aplikante ba vaga membru PNTL foun hato’o keixa ba PDHJ
Iha loron 03 Fevereiru 2026, Komisaun Rekrutamentu PNTL liuhusi Portavós Komandu Jerál PNTL, António da Luz, anúnsiu lista kandidatu kadetes foun ba públiku liuhusi fontes mídia nasionál sira iha Timor-Leste ho totál kandidatu 12.874.
Husi númeru ne’e, kandidatu 10.597 mak aprovadu no kandidatu 2.277 mak la aprovadu. Husi kandidatu aprovadu sira, Komisaun Rekrutamentu deside katak iha kandidatu hamutuk 400 de’it maka sei tuir teste médiku, enkuantu kandidatu ho kategoria aprovadu sira seluk sei labele tuir.
Diretór Ezekutivu dehan, husi teste médiku ne’e karik identifikadu balun ne’ebé ho kondisaun saúde la permite mak sei la kontaktu kandidatu seluk.
“Desizaun ida-ne’e la justu, diskriminativu no la garantia prátika partisipativu no boa Governasaun Timor-Leste. Tanba la hatan ba Diploma Ministeriál nú. 17/2025 25 Juñu hodi hetan ba artigu 42 alinea 1 husi Diploma ne’e rasik. FONGTIL họ nia membru sira nafatin deskonfia katak prátika sira ne’e hodi hatan ba artigu 37 alinea A no B ne’ebé fó prioridade ba jerasaun patriota no PNTL ativu nia oan sira mak bele liu. Maibé diploma ministerial nú. 17/2025 25 Juñu ne’e Tribunál Rekursu deklara inkonstituisionál ona,” nia katak.
Nune’e, nia husu ba ba Provedoria Direitu Umanu no Justisa (PDHJ, sigla portugés) atu imediatamente halo investigasaun kle’an hodi hatene tendénsia ba prátika sira ne’ebé kontra prinsípiu Boa Governasaun.
Incêncio mós lori FONGTIL hodi husu ba Parlamentu Nasionál Komisaun B ne’ebé trata asunta Negósiu Estranjeiru, Defeza no Seguransa atu halo fiskalizasaun ba prosesu rekrutamentu ne’ebé iha tendénsia atu kontra prinsípiu Boa Governasaun.
Jornalista : Natalino Costa
Editora : Julia Chatarina
