DILI, 06 Fevereiru 2026 (TATOLI)–Ekipa S’amuser Football Club (FC) to’o jornada 11 kontinua lidera tabela klasifikasaun primeira divizaun Liga Futeból Femininu Timor-Leste (LFFTL).
S’amuser FC lidera ho pontu 31 hafoin manán jogu sanulu (10), impata ida (1) no seidauk derrota iha-ne’ebé diferensa pontu lima (5) ho AD SLB ne’ebé okupa iha pozisaun daruak hafoin rekollla pontu 26 rezultadu husi manán jou ualu (8), impata rua (2) no derrota ida (1).
S’amuser hahú volta daruak iha jornada dasanuluk manán Akadémika ho skor 0-4 no iha jornada da-11 manán UNITAL FC ho skor 10-0 no iha posibilidade sei aumenta pontu tolu iha jornada da-12 bainhira kontra ekipa Kulugisa FC iha Kampu Federasaun Futeból Timor-Leste (FFTL), Bairros dos Grilos, Sábadu (07/02/2026).
Notísia relevante: S’amuser FC lidera tabela klasifikasaun primeiru divizaun LFFTL
Pozisaun datoluk okupa husi ekipa Buibere FC ho pontu 26, rezultadu husi manán jogu ualu (8), impata rua (2) no derrota ida (1), enkuantu Maudoko FC iha pozisaun dahaat (4) bainhira manán jogu hitu (7), impata rua (2), derrota rua (2) ho totál pontu 23.
Maranatha FC iha pozisaun dalimak (5) hafoin rekolla pontu 18 bainhira manán jogu lima (5), imapta tolu (3) no derrota tolu (3). Pozisaun daneen (6) okupa husi ekipa Akadémika FC ho totál pontu 13, rezultadu husi manán lima (5) no derrota hitu (7).
Ekipa UNITAL FC iha pozisaun dahitu hafoin derrota ualu (8) no manán iha jogu tolu (3) ho totál pontu sia (9), enkuantu ekipa promovidu VDL FC iha pozisaun daualu (8) ho pontu hitu (7), rezultadu manán rua (2), impata ida (1) no derrota jogu ualu (8).
Entretantu, ekipa rua seluk okupa iha zona mean hanesan Na’in-Feto FC iha pozisaun dasiak (9) hafoin manán ida (1), impata 1 (ida) no derrota sia (9), aleinde ne’e Kulugisa FC to’o jornada da-11 seidauk rekolla pontu hafoin derrota iha jogu 11 LFFTL.
Jornalista: Natalino Belo
Editór: Xisto Freitas da Piedade
