SMSA Kovalima deskobre fatin prosesamentu tahu-tempe la ijiéne
KOVALIMA, 04 Fevereiru 2026 (TATOLI)-Servisu Munisipál Seguransa Alimentár munisípiu Kovalima, deskobre fatin produsaun no prosesamentu tahu no tempe hamutuk 10 iha Kovalima, durante ne’e hala’o sira-nia atividade maibé seidauk iha kondisaun ida ijiéne ka moos.
Diretór Servisu Munisipál Seguransa Alimentár, Hilario Oliveira, informa ba TATOLI, katak rezultadu monitorizasaun iha tinan 2025 nota fatin produsaun tahu no tempe hirak ne’e seidauk priense kritéria loloos atu oinsa halo produsaun tanba la ijiéne.
“Ita haree direta prosesu produsaun tahu no tempe iha munisípiu Kovalima, bazeia ba observasaun seidauk iha ijiéne,” nia hateten ba TATOLI, horiseik.
Tuir nia fatin produsaun hirak ne’e seidauk ijiéne tanba laiha fatin lixu, seidauk iha fatin akumulasaun bee fo’ér, no seluk tan, nune’e iha okaziaun ne’ebá Servisu Munisipál Seguransa Alimentár husu kedas na’in ba produsaun tahu no tempe atu hadia kondisaun infraestrutura nune’e bele garante kondisaun moos atu produz tahu no tempe hodi faan ba komunidade atu konsumu.
“Ho kondisaun ne’ebé mak iha Autoridade Kovalima fó hanoin no husu atu hadi’a fatin produsaun tahu no tempe nune’e bele garante ijiéne,” nia hatutan.
Ho problema ne’e maka Servisu Munisipál Seguransa alimentar liuhosi orsamentu jerál Estadu 2026, prevee orsamentu USD 200.00 hodi prodúz manuál kona-bá produsaun tahu no tempe ba distributór tahu no tempe atu implemnta tuir manuál ne’e iha hodi garante kualidade no ijiéne ba konsumidór sira.
“Ita prodúz tahu ema sosa han garante konsumidór sira-nia saúde ho orsamentu ne’ebé iha imprime manuál,” tenik tan.
Hatan ba preokupasaun ne’e Ana Godinha Sequeira, hanesan na’in ba produsaun tahu no tempe rekoiñese fatin produsaun tahu no tempe seidauk iha kondisaun di’ak hodi prodúz tahu no tempe atu faan ba iha merkadu.
“Tuir autoridade halo monitorizasaun hodi fó rekomendasaun ba ami katak fatin atu prodúz tahu no tempe presiza garante ijiéne, prodúz tahu labele uza bidon no tenke halo bee dalan atu bee fo’ér labele nalihun,” nia hateten.
Konsumidór Noverto da Cruz, hateten autoridade munisípiu persiza reforsa iha monitorizasaun no inspesaun atu nune’e kompañia ka pesoál ne’ebé prodúz tahu no tempe tenke priénse kritéria importante maka ijiéne atu konsumidór sira bele konsumu.
“Ha’u sente autoridade sira presiza halo monitorizasaun hodi haree direta fatin prosesamentu tahu no tempe ne’ebé maka durante ne’e sidadaun sira prodúz tahu ho tempe iha fatin ne’ebé maka ladun ijiéne presiza atu hadi’a,” nia preokupa.
Jornalista: Celestina Teles
Editór: Florencio Miranda Ximenes
