VIKEKE, 06 Fevereiru 2026 (TATOLI)–Diretór Programa Nasionál Dezenvolvimentu Suku (PNDS) Munisípiu Vikeke, Francisco Soares Varela, hateten Governu no Autoridade Munisípiu Vikeke deside implementa obra PNDS tolu iha Suku Maluru-Beasu, Postu Administrativu Vikeke Vila, Munisípiu Vikeke.
“Suku Maluru kuaze tinan haat Governu bandu la implementa obra dezenvolvimentu sira seluk, inklui obra PNDS rasik. Tanba área ne’e dignasaun ba Planta Liquefied Naturál Gas (LNG). Tan ne’e, obra hotu-hotu husi Governu tantu parseiru dezenvolvimentu la implementa. Hafoin Governu muda LNG bá Natarbora ne’ebá, mak ami halo aprosimasaun hodi enkontru ho Ministériu Administrasaun Estatál (MAE) no Prezidente Autoridade Munisípiu Vikeke mak halo koordenasuan ho Ministériu Rekursu Minarai. Nune’e, MAE fó orientasaun katak tinan ida-ne’e obra PNDS implementa fali iha Suku Maluru. Nune’e mós ita-nia PAM Vikeke autoriza ho karta ida para obra PNDS ne’e tenke implementa iha Suku Maluru iha 2026,” Francisco Soares Varela dehan ba TATOLI iha Postu Administrativu Vikeke Vila, Sesta ne’e.
Diretór PNDS ne’e relata, obra PNDS ne’ebé implementa iha Suku Maluru tinan 2026 mak hanesan obra adsionál mak alargamentu sede Suku Maluru, irrigasaun no refeitóriu merenda eskolár iha EBC Komandante Rosito Beasu.
“Durante ne’e ita-nia populasaun Suku Maluru la hetan sira-nia diretu PNDS iha kada tinan. Nune’e, durante tinan haat ne’e Suku Maluru sai vítima ba dezenvolvimentu,” nia hato’o.
Francisco informa obra PNDS ne’ebé implementa iha Suku Maluru ne’e sei implementa dala ida ho suku 38 inklui Suku Maluru, ne’ebé PNDS sei implementa iha fulan-Marsu nia laran.
Iha 2026, PNDS aloka orsamentu hamutuk $55.215,61 ne’ebé aloka bá projetu konstrusaun sistema iriigasaun Aldeia Maluru ho orsamentu $25.215,61 no projetu adisionál rua mak hanesan refeitóriu merenda eskolár EBC Komandante Rosito Beasu $15.000 no alargamentu sede suku $15.000.
Iha fatin ketak, Xefe Suku Maluru, Postu Administrativu Vikeke Vila, Munisípiu Vikeke, Bendito Soares hateten PAM autoriza ona nune’e 2026 sei implementa fali obra PNDS hamutuk unidade tolu ne’ebé mak tama iha Suku Maluru.
“Ami simu ona orientasaun husi ita-nia PAM katak tinan-ne’e ita sei implementa obra PNDS iha Suku Maluru.
Maibé, iha tinan ida-ne’e mak la implementa ami sei kontinua koordena ho parte relevante sira hodi ezije direitu nu’udár povu Timor-Leste. Tanba ami Suku Maluru kuaze tinan haat nia laran lakon direitu ba dezenvolvimentu,” nia dehan.
Tuir dadus, populasaun Suku Maluru hamutuk 1.245 ne’ebé kompostu husi mane 635 no feto 610 ho totál uma-ka’in hamutuk 301. Enkuantu, iha Suku Maluru iha aldeia tolu kompostu husi Aldeia Maluru, Makaloso no Loho-Oan.
Jornalista: Vitorino Lopes da Costa
Editór: Xisto Freitas da Piedade
