VIKEKE, 07 Fevereiru 2026 (TATOLI)—Administradór Postu administrativu Ossú, José da Silva Amaral hateten, daudaun ne’e, ekipa husi Institutu Jestaun Ekipamentu Apoia Dezenvolvimentu Infraestutura, Institutu Públiku (IGEADI, I.P.) destaka ona ekipamentu pezadu iha Asalaitula, Postu Ossú, atu normaliza estrada ku’ak sira.
“Durante ne’e estrada Asalaitula to’o iha Postu Ossú Vila ne’e difikulta transporte públiku sira tanba estrada ku’ak ne’e barak liu no bee nalium mós barak. Tan ne’e, foin lalais ne’e ha’u halo pedidu ba IGEADI hodi husu apoiu normaliza dalan ku’ak sira,” José da Silva Amaral ba TATOLI iha Postu Ossú, Sábadu ne’e.
Autoridade Postu Ossú ne’e relata ekipa IGEADE hahú mobiliza ekipamentu pezadu mai Ossú iha 02 fulan-Fevereiru 2026, depoiz ekipa sira hahú servisu to’o agora.
“Ba normalizasaun estrada hahú husi Asalaitula to’o Ossú ne’e ekipa ateru rai-mutin ba estrada ku’ak sira-ne’e. Ha’u sente husi apoia IGEADI nian ba normalizasaun ida-ne’e bele fasilita ona transporte hanesan karreta ki’ik sira bele halo movimentasaun di’ak,” nia subliña.
José esplika ekipamentu ne’ebé IGEADI destaka iha Asalaitula kompostu husi eskavatór, silindru, gleder no karreta truk sira hodi apoia ba normalizasaun estrada.
Nia hato’o agradesimentu ba IGEADI tanba tau konsiderasaun ba povu Ossú nia pedidu hodi halo normalizasaun ba estrada referida.
Enkuantu, normalizasaun estrada ne’e atinje ona metru 300-resin, ne’ebé daudaun ne’e fasilita ona movimentu transporte sira.
Jornalista: Vitorino Lopes da Costa
Editór: Xisto Freitas da Piedade
