DILI, 07 Fevereiru 2026 (TATOLI)–Primeiru-Ministru, Kay Rala Xanana Gusmão hamutuk ho governante sira seluk hala’o observasaun ba kanál irrigasaun rai okos iha mota Sumasi no mota Lakló, Manatutu.
Ministru Agrikultura, Pekuária, Peska no Floresta, Marcos da Cruz, esplika mota Sumasi ne’e iha kanál irrigasaun ida-ne’ebé hetan bee husi mota Lakló no kanalizasaun ida-ne’e halo kedas iha tinan 2002 husi Governu Japaun maibé durante tinan barak nia laran destruidu husi sedimentasaun sira liuliu buat ida bolu dehan sipon ho naruk metru 300, maibé iha metru 160 maka nakonu ho sedimentasaun.
Nia informa Governu halo ona kontratu emerjénsia ho empreza Bandido Qualidade ho montante orsamentu millaun $1-resin hodi hamoos sedimentasaun no mós halo protesaun gabion (bronjong) naruk metru 800, aas metru 5 ba mota Sumasi, ne’ebé distribui bee bá natar kuaze ektare 800-resin iha Postu Manatutu Vila.
“Baibain iha finde fulan-Fevereiru ka inísiu fulan-Marsu agrikultór sira hahú halo ona natar, entaun fiar katak servisu ne’e bele ramata iha semana oin,” Ministru informa ba jornalista sira iha Manatutu, Sesta (06/01/2026).
“Ida fali mak ohin ita liu sa’e mai haree ne’e maka mota Lakló ne’ebé simu bee husi mota Laklubar no Aileu, no ita mobiliza ona eskavatór rua halo normalizasaun no kee kanalizasaun tradisionál lima no husi mota ne’e nia ulun kuaze kilómetru rua ne’ebé iha tinan ne’e ita sei halo konstrusaun irrigadaun boot ida no prosesu iha hela Komisaun Nasionál Aprovizionamentu (CNA-sigla portugeza). Fulan ida-ne’e nia laran finaliza ona no fulan rua ka tolu mai ita bele halo lansamentu,” Marcos esplika.
Jornalista: Alexandra da Costa
Editór: Xisto Freitas da Piedade
