DILI, 07 Fevereiru 2026 (TATOLI)–Governu liuhusi Sekretaria Estadu Formasaun Profisionál no Empregu (SEFOPE) iha polítika atu espande sentru formasaun ba nivel munisipál no postu sira hodi aumenta númeru traballadór ba rai-li’ur.
Sekretáriu Estadu Formasaun Profisionál no Empregu, Rogério Araújo Mendonça, hateten iha tinan hirak liubá joven barak mak konsentra iha kapitál Dili hodi tuir formasaun sira, entaun oinsá polítika Governu ninia bele lori sentru formasaun sira bá iha munisípiu ka postu idaidak nune’e joven sira bele asesu, bainhira iha rekrutamentu ruma sira bele hetan oportunidade servisu.
“Númeru traballadór re-entry iha Austrália ne’e ho númeru ki’ik, maski empregadór balun maka kontinua fó konfiansa ba traballadór tuan sira, entaun númeru traballadór foun iha Austrália ne’e aumenta,” nia informa ba TATOLI iha nia kna’ar fatin, Kaikoli, Sesta (06/02/2026).
Entretantu, tipu formasaun ne’ebé SEFOPE atu espande ba munisípiu sira maka kona-ba língua inglés, japones, koreia, portugés, komputadór no jestaun administrasaun. Prosesu atu estabelese ne’e tuir planu sei realiza iha tinan ne’e ka tinan oin.
Jornalista: Alexandra da Costa
Editór: Xisto Freitas da Piedade
