DILI, 09 Fevereiru 2026 (TATOLI)—Kónsul Jerál Dezignadu Repúblika Maldivas, Bobby Mohanty, hasoru malu ho Vise Primeiru-Ministru, Ministru Koordenadór Asuntu Sosiál, Ministru Dezenvolvimentu Rurál, Ministru Abitasaun Komunitária, Mariano Assanami Sabino, hodi diskute kona-ba kooperasaun bilaterál atu investe iha setór saúde, edukasaun no petróleu.
Kónsul Jerál Dezignadu Repúblika Maldivas, Bobby Mohanty, hateten nia simu informasaun kona-ba Timor-Leste husi ema importante lubun boot ida iha India liuliu ho Embaixadór Timor-Leste iha India, ne’ebé fasilita prosesu hotu hodi mai to’o iha Timor-Leste.
“Bainhira ha’u to’o iha Timor-Leste, ha’u hasoru malu ho Prezidente Repúblika, José Ramos Horta, tanba hanesan ema ida-ne’ebé hatene kona-ba India nia investimentu no diplomásia. Hafoin ne’e, ha’u ba hasoru malu ho Ministru Negósiu Estranjeiru no Kooperasaun, Ministru Petróleu Rekursu Minerál, ne’ebé ami ko’alia kona-ba oinsá halo invetimentu iha área petróleu”, nia informa ba jornalista sira iha Palásiu Governu, ohin.
Maibé, nia hateten, objetivu importante liu mak konvoka sorumutu ho Vise Primeiru-Ministru II, ne’ebé promete ona apoiu prosesu investimentu hotu hodi lori estudante no enjiñeiru sira husi India kontinua hala’o estudu komparativu iha universidade UCT no UNPAZ iha Timor-Leste.
Nia afirma, pontu importante ne’ebé sira diskute iha enkontru ne’e mak oinsá bele harii ospitál privadu iha Timor-Leste ne’ebé sei investe husi India, maibé ida-ne’e sei iha prosesu tanba ida-ne’e tenke komunika ho Ministra Saúde hodi bele haree oportunidade ida-ne’e mós bele loke eskola.
“Ha’u mós sei servisu hodi lori investór sira husi India mai iha Timor-Leste no ha’u fiar katak hanesan nasaun ne’ebé joven entaun iha oportunidade barak atu investe. Ha’u sei fila ba maibé prosesu kooperasaun kontinha la’o atu ita bele hasoru malu iha tempu seluk bainhira ha’u lori fali investór sira mai iha ne’e,” nia hateten.
Jornalista : Alexandra da Costa
Editór : Cancio Ximenes
