DILI, 09 Fevereiru 2026 (TATOLI)—Embaixadora Austrália ba Timor-Leste, Caitlin Wilson, segunda ne’e, hala’o enkontru ho Vise Primeiru-Ministru, Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Assanami Sabino, hodi hametin kooperasaun bilaterál iha área oioin hanesan edukasaun, saúde no jéneru.
Nia hateten, objetivu enkontru ne’e atu atualiza mós kona-ba vizita PM Austrália ne’ebé liu ona, no ko’alia kona-ba programa prioridade saida mak Governu Austrália apoia ba iha Governu Timor-Leste.
“LIuliu ba iha programa inisiativa ida ba tinan 10 nian, ne’ebé mak Governu Austrália sei apoiu liu ba iha área saúde, edukasaun, jéneru ho visibilidade nian, aumezmu tempu mós haree katak posibilidade saida mak Governu Austrália bele apoiu liután ba iha Governu Timor-Leste,” Embaixadora ne’e informa ba jornalista sira iha Palásiu Governu, ohin.
Nia haktuir, Vise Primeiru-Ministru kontente hodi simu sira-nia prezensa liuliu ba vizita PM Austrália ne’ebé liu ona, inisiativa sira-ne’ebé diskute tiha ona ho vise PM no prontu atu ajuda.
“Tanba kolaborasaun entre Timor-Leste ho Austrália ne’e la’o di’ak tebes durante ne’e, entaun ita tenke mellora no fortalese di’ak liután iha future,” nia dehan.
Jornalista : Alexandra da Costa
Editór : Cancio Ximenes
