DILI, 09 Fevereiru 2026 (TATOLI)-Ekipa konjunta ne’ebé kompostu husi Komisaun Funsaun Públika (CFP, sigla portugés), Komisaun Anti-Korrupsaun (KAK), Inspesaun-Jerál Estadu, Diresaun-Jerál Patromóniu Estadu, hala’o vizita supreza ba Ministériu Obra Públika (MOP), iha Kaikoli, Dili, ho objetivu observa funsionamentu serbisu instituisaun ne’e nian.
Komisáriu Asuntu Disiplinár iha Komisaun Funsaun Públika, Agapito da Conceição, hateten vizita ne’e la’o ona dezde iha 2024 até to’o munisípiu balun, no ohin kontinua observa instituisaun públika sira-nia serbisu, katak atividade tuir suni planu instituisaun nian, rekursu umanu efetivu ka la’e no identifika lakuna ruma maka rekomenda atu hadi’a.
“Ekipa idaidak haree nia knaar. [KFP] haree liu sira-nia prezensa serbisu ne’e la’o duni no tuir oras ka la’e ho atividade sira ne’ebé liga liu ba administrasaun tuir duni regra no prosedimentu? Tan ne’e, ho vizita [ ne’e halo apelu] ho kuidadu, serbisu tuir regra no lei ne’ebé iha”, nia hateten hafoin ramata vizita ne’e iha edifísiu MOP, iha Kaikoli.
Bibán ne’e ekipa mós foti dadus durante vizita, maibé Komisáriu KFP ne’e seidauk bele pronúnsia sai kona-ba irregualiridade ruma ne’ebé iha, tanba sei halo relatóriu konjuntu hafoin relata ba Konsellu Ministru no ministériu tutela ho nia rekomendasaun sira.
Nia dehan vizita sira antes ne’e ninia relatóriu aprezenta ona ba Konsellu Ministru hafoin Primeiru-Ministru orienta ba ministériu tutela idaidak ne’ebé iha. “Bazeia ba rezultadu supreza no peskiza sira ne’e mak hodi identifika lakuna iha instituisaun públika. Ho ida-ne’e mak halo daudaun reforma administrasaun públika hanesan ajustamentu renumerasaun ho seluk tan”, dehan.
Komisáriu Adjuntu ba Prevensaun iha KAK, Rosário Salsinha Araújo, reforsa katak vizita dahuluk atu observa direta serbisu aprovizionamentu, lojístika no rekursu umanu, tanba ida-ne’e rekursu boot Estadu nian ne’ebé tenke serbisu ho kuidadu.
Tuir nia, fatin sira hanesan Obra Públika iha risku no tentasaun barak ne’ebé bele mosu, tanba poténsia ba empreza sira ne’ebé iha osan tenta lori funsionáriu sira monu ba sala.
“Monu ba sala ne’e parte serbisu KAK nian atu haree, ida-ne’e mak mai vizita surpreza ne’e parte interesante ida atu fó hanoin ba funsionáriu sira serbisu ho kuidadu, sees an husi irregularidade sira, kumprimenta ba lei, respeitu ba orden, hadomi nasaun”, nia subliña.
Hodi énfaze vizita surpreza ne’e mós hanesan medida preventiva atu fó hanoin tanba id- ne’e parte serbisu akonsellamentu ida husi instituisaun kontrolu Estadu sira ne’ebé iha knaar tomak atu halo kontrolu ba rekursu tomak Estadu nian
Ministru Obra Públika, Samuel Marçal, konsidera vizita ne’e importante hodi kontinua fó hanoin ba funsionáriu hotu atu serbí ho di’ak liután.
Jornalista: Nelson de Sousa
Editora: Maria Auxiliadora
