DILI, 09 Fevereiru 2026 (TATOLI) – Ekipa konjunta ne’ebé kompostu husi Komisaun Funsaun Públika (KFP), Komisaun Anti-Korrupsaun (KAK), Inspesaun-Jerál Estadu, Diresaun-Jerál Patromóniu Estadu no Polísia Unidade Tránzitu, komesa intensifika kontrolu ba sirkulasaun veíkulu Estadu liu oras no iha loron feriadu ba asuntu privadu.
Komisáriu ba Asuntu Disiplinár iha KFP, Agapito da Conceição, hateten ekipa hahú halo kontrolu iha semana kotuk no sei kontinua observa sirkulasaun veíkulu Estadu ne’ebé funsionáriu sira utiliza liu oras serbisu no loron feriadu ba asuntu privadu ne’ebé laiha orden serbisu.
Durante operasaun konsege identifika servidór públiku balun utiliza veíkulu Estadu laiha orden serbisu nune’e sei prosesa.
Nia dehan kargu xefia sira iha liña ministeriá sira daudaun simu ona subsídiu transporte, nune’e la autoriza atu lori karreta bá uma no asuntu privadu. “Kumpri lei númeru 80/2022 [Regulamentu Veíkulu Estadu], iha ne’ebá iha rekezitu lubun, karik ita iha serbisu ruma tenke iha orden serbisu”, nia hato’o.
Komisáriu Adjuntu ba Prevensaun iha KAK, Rosário Salsinha Araújo, reforsa katak operasaun ne’e hala’o hela hodi fó hanoin ba ministériu hothotu katak veíkulu Estadu uza de’it ba fin profisionál.
Nia relata katak ekipa hala’o vizita bá instituisaun autónoma lubuk ida ne’ebé karreta Estadu nian uza hela xapa matrikula privadu ho tempu kle’ur, nune’e husu atu muda fali ba xapa matríkula Governu nian.
“Iha semana ida ne’e ba oin sira muda ona [hanesan] iha Autoridade Nasionál Petróleu, Autoridade Nasionál Mineiru, Institutu Nasionál VIH/Sida, Institutu Jeolojia, nune’e bele halo kontrola di’ak liután”, nia dehan.
Tuir dadus 2025, ekipa konjunta rejista irregularidade 70-resin kona-ba veíkulu Estadu ne’ebé sirkula laiha oras serbisu.
Lembra mós katak, iha relatóriu Kámara Konta ba Konta Jerál Estadu 2024 ne’ebé foin lalais aprezenta ba Parlamentu Nasionál, identifika katak subsídiu kombustivel ba transporte ne’ebé Governu fó ba funsionáriu sira seidauk implementa ho di’ak, tanba kargu xefia sira mantein uza transporte Governu nian. Situasaun ne’e kontinua fó impaktu boot ba gastu boot Estadu iha kombustivel no transporte.
Jornalista: Nelson de Sousa
Editora: Maria Auxiliadora
