DILI, 09 Fevereiru 2026 (TATOLI)—Ministériu Ensinu Superiór, Siénsia no Kultura (MESSK), publika ona naran estudante ne’ebé liu ona selesaun hodi asesu Universidade Nasionál Timor Lorosa’e (UNTL) hamutuk 5.358 no Institutu Polítika Betano (IPB) 343.
“Tinan ne’e númeru estudante ingresu ba instituisaun rua ne’e barak tanba sira-nia valór ne’ebé hansan mós barak, nune’e ita labele husik balun iha kotuk. Tanba ne’e, sira-ne’ebé valór hanesan tenke liu hotu,” Ministru Ensinu Superiór, Siénsia no Kultura, José Honório da Costa Pereira Jerónimo dehan ba jornalista sira iha salaun MESSK, Kolmera, Segunda ne’e.
Notísia relevante: Kandidatu admitidu ba UNTL no IPB iha tinan 2025 hamutuk 5.749
Nia dehan, ba estudante ne’ebé mak la admitidu tanba sira-nia valór la to’o kritéria MESSK nian.
“Ha’u foti ezemplu hanesan estudante medisina mak ho valór to’o de’it 55 mai kraik sira labele liu tanba ita hakarak estudante sira-ne’ebé mak asesu ba UNTL tenke ho kualidade ne’ebé di’ak,” nia subliña.
José Honório husu ba estudante sira-ne’ebé mak haree naran la admitidu bele halo reklamasaun komesa iha loron 10-16 Fevereiru.
Aleinde ne’e, José Honório mós husu ba estudante foun sira atu asesu ba lista referida tenke vizita pájina Ensinu Superiór, Siénsia no Kultura no Universidade Nasionál Timor Lorosa’e nian.
Iha fatin hanesan, Prezidente Komisaun Asesu Ensinu Superiór, Domingos Barros dehan númeru estudante ne’ebé admitidu liuhusi rejime jerál hamutuk na’in-4.737 kompostu husi Ensinu Sekundáriu Jerál na’in-3.856 no Ensinu Sekundáriu Tékniku Vokasionál hamutuk na’in-881.
Aleinde ne’e, liuhusi rejime espesiál sub-rejime oportunidade iha 571, rejime espesial sub-rejime veteranu no mártir nia oan iha 101, rejime espesiál sub-rejime hakbiit iha 154, rejime espesiál sub-rejime ema ho defisiénsia, F-FDTL, PNTL no rezidénsia munisípiu hamutuk 138.
Nia esplika kandidatu sira husi kategoria rejime espesiál sub-rejime oportunidade ne’ebé laiha kololasaun (la admitidu) ba UNTL-IPB hamutuk 43, ba veteranu no mártir nia oan ne’ebé laiha kololasaun (la admitidu) ba UNTL-IPB hamutuk 50. Nune’e mós ba kategoria hakbiit ne’ebé la admitidu 107 no rejime jerál ne’ebé laiha kololasaun hamutuk 7.024.
Iha sorin seluk seluk, Reitór Universidade Nasionál Timor Lorosae (UNTL), Joviano António da Costa informa UNTL sei hahú halo inskrisaun ba estudante foun iha 16 Fevereiru no sei ramata iha 11 Marsu.
“Klaru katak UNTL iha kalendáriu rejistu ba estudante foun sira maibé UNTL labele halo servisu mesak tanba tenke halo servisu hamutuk ho MESSK, mak ami prepra ona ami-nia prosesu oinsá atu simu estudante sira iha semana oin mai,” nia dehan.
Governante ne’e hatutan maski estudante ho númeru ne’ebé boot maibé UNTL iha fasilidade ne’ebé sufisiente atu akomoda estudante sira-ne’e hotu.
Jornalista: Osória Marques
Editór: Xisto Freitas da Piedade
