DILI, 09 Fevereiru 2026 (TATOLI)–Prezidente Administrasaun Institutu Seguransa Sosiál (INSS), Zeferino da Costa Bobo informa INSS halo ona pagamentu ba funsionáriu reformadu iha semana kotuk (Janeiru nia rohan).
“Pagamentu ba ita-nia funsionáriu reformadu sira, ita halo ona iha semana kotuk. Daudaun ne’e kontinua prosesa ba sira-ne’ebé mak dokumentu seidauk kompletu,” nia dehan ba jornalista sira iha Sentru Konvensaun Dili (CCD-sigla portugeza), Dili, Segunda ne’e.
Bobo esplika funsionáriu reformadu ne’ebé INSS halo ona pagsmentu besik na’in-2.000, maiória Ministériu Edukasaun, tuir mak Ministériu Saúde no ministériu ka instituisaun sira seluk númeru ki’ik.
“Ita sei paga sira fulan-fulan no to’o sira mate. Pagamentu ne’e hanesan baibain liuhosi banku no osan ne’ebé ita aloka ne’e $451.976,53,” nia subliña.
Notísia relevante: Governu no parseiru sosiál halo diálogu abertu kona-ba investimentu Fundu Seguransa Sosiál
Prezidente INSS hatutan funsionáriu públiku uza rejime rua, ida mak rejime tranzitóriu no rejime jerál. Rejime tranzitóriu katak antes ne’e sistema seguransa sosiál seidauk iha, ne’ebé ita sei konta hosi 20 Maiu 2002 to’o mai iha 2017. Ida-ne’e Estadu mak rai hela. Hosi 2017 mai oin tama rejime jerál, ne’ebé konta sira-nia direitu ne’e la tun liu husi 50%.
Bobo dehan depende ba nia durasaun servisu no haree ba kuantidade saláriu, nune’e benefisiáriu sira-ne’e nia direitu sei la hanesan tanba diferensa saláriu no tinan servisu.
Entretantu, nia hatutan, ema ne’ebé asesu ba mobille App kuaze 2.000, maibé instituisaun Estadu ne’ebé durante ne’e asesu ka sai benefisiáriu ona tenke update ka submete ba INSS kada fulan.
“Ida-ne’e ho objetivu atu ita hatene sira-nia kontribuisaun fulan-fulan para ita bele halo kalkulasaun ba sira-nia osan ne’e,” Bobo subliña.
Jornalista: Osória Marques
Editór: Xisto Freitas da Piedade
