DILI, 16 Fevereiru 2026 (TATOLI)–Jogu volta dahuluk meiu finál Tasa Liga Federasaun Futeból Timor-Leste (FFTL) entre ekipa Assalam Football Club (FC) kontra Karketu Dili FC ramata ho skor 1-1.
Assalam FC ne’ebé nu’udár ekipa médiu iha Liga Futeból Timor-Leste (LFTL) hatudu jogu ne’ebé atrativu hodi trava Karketu Dili FC iha Estádiu Munisipál Dili, Domingu (15/02/2026).
Notísia relevante: Karketu mehi hakarak liki Assalam ho pontu tolu iha volta dahuluk
Iha jogu parte dahuluk, elementu Adu Marques ne’e lidera uluk bainhira jogadór Augosto da Costa prodús golu iha minutu 30 iha-ne’ebé golu referidu to’o hakotu parte dahuluk ho tabela skor 1-0.
Assalam FC rasik lidera jogu to’o minutu 80. Liu minutu tolu (minutu 83) Karketu Dili FC konsege responde golu liuhusi jogadór Daniel Gaio, nune’e obrigadu ekipa rua fahe pontu ba malu iha volta dahuluk.
Ho rezultadu jogu referidu, Assalam FC no Karketu Dili FC iha pontu hanesan ka pontu ida (1) no produtividade golu (+/-) 0 iha-ne’ebé jogu volta daruak sei determina destinu ekipa rua bá finál ne’ebé tuir oráriu sei realiza iha Estádiu Munisipál Dili, Domingu (22/02/2026).
Jornalista: Natalino Belo
Editór: Xisto Freitas da Piedade
