DILI, 12 Fevereiru 2026 (TATOLI)—Karketu Dili Football Club (FC) mehi hakarak liki Assalam FC ho pontu tolu iha volta dahuluk iha meiu finál Tasa Liga Federasaun Futeból Timor-Leste (FFTL) 2025.
Treinadór Karketu Dili FC, Bernard Teye esplika hafoin hakat bá meiu finál, nia parte kontinua kedas halo preparasaun no hakarak manán bainhira kontra Assalam FC iha volta dahuluk meiu finál ne’ebé sei realiza iha Estádiu Munisipál Dili, Domingu (15/02/2026).
“Assalam ekipa forte maibé tatikamente ami preparadu atu manán jogu ne’e,” Treinadór Karketu Dili FC hateten iha Estádiu Munisipál Dili, Kinta (12/02/2026).
Notísia relevante: Karketu reprezenta Grupu D hakat bá meiu finál
Iha fatin hanesan, Jogadór Karketu Dili FC, Olagar Xavier reforsa katak sira iha ambisaun rekolla pontu tolu tanba halo ona preparasaun másima durante treinu ne’ebé fó husi treinadór iha kampu.
“Ekipa hotu iha forsa maibé ami sempre hakarak manán Assalam iha jogu meiu finál,” Olagar Xavier argumenta.
Ekipa Karketu hakat bá meiu finál Tasa Liga FFTL hafoin sai vensedór iha Drupu D ho pontu sia (9), enkuantu Assalam FC reprezenta Grupu B hafoin rekolla pontu neen husi jogu rua.
Entretantu, tuir regulamentu jogu Tasa Liga FFTL iha kapítulu IV artigu 1 hateten klasifikasaun faze grupu ho sistema meia kompetisaun no artigu 2 dekreve faze meiu finál sei hala’o jogu daruak (home and away) hodi determina pontu antes hakat bá finál.
Jornalista: Natalino Belo
Editór: Xisto Freitas da Piedade
