DILI, 09 Fevereiru 2026 (TATOLI)—Ekipa Karketu Dili Football Club (FC) reprezenta Grupu D hakat bá meiu finál Tasa Liga Federasaun Futeból Timor-Leste (FFTL) 2025.
Karketu Dili susesu lidera tabela klasifikasaun Grupu D bainhira rekolla pontu neen (6) hafoin iha jogu ikus kontra Santa Cruz FC manán ho skor 8-1 ne’ebé hala’o iha Estádiu Munisipál Dili, Domingu (08/02/2026).
Elementu Treinadór Bernard Teye ne’e lidera ho skor 4-0 iha parte dahuluk iha-ne’ebé golu haat referidu prodús husi jogadór sira hanesan Ola Olípio iha minutu 4 no 32, Carsino 30 no Daniel Gaio iha minutu 44.
Notísia relevante: Karketu lolo As Marca 3-1, AD SLB gaña pontu 3-0 husi Aitana
Ekipa Matak Malirin aumenta tan golu haat iha parte daruak iha-ne’ebé jogadór Carsino susesu prodús golu tolu iha minutu 47, 55 no 85 no golu ida seluk prodús husi Olagar Malik iha minutu 58, enkuantu Santa Cruz FC konsege responde ho golu ida-ne’ebé enxe husi jogadór Brocklyn Guterres iha minutu 52.
Ho rezultadu jogu entre ekipa rua, rezulta ekipa Santa Cruz tenke eliminadu hafoin derrota iha jogu rua (2) ho pontu 0, nune’e mós As Marca ne’ebé iha klasifikasaun daruak ho pontu tolu (3) hafoin manán ida (1) no derrota ida (1).
Entretantu, ekipa haat ne’ebé serteja ona hakat bá meiu finál Tasa Liga FFTL hanesan Grupu A reprezenta husi Emanuel FC, Grupu B Assalam FC, Grupu C Portu Taibessi no Grupu D Karketu Dili FC.
Jornalista: Natalino Belo
Editór: Xisto Freitas da Piedade
