DILI, 26 Janeiru 2026 (TATOLI)–Jogu Grupu D rezulta Karketu Dili Football Club (FC) lolo As Marca 3-1, enkuantu iha Grupu A ekipa AD SLB gaña pontu tolu husi Aitana FC ho skor 3-0 iha kompetisaun Tasa Liga Federasaun Futeból Timor-Leste (FFTL).
Ekipa Karketu Dili FC ne’ebé konsideradu nu’udár ekipa jigante lolo AS Marca iha Estádiu Munisipál Dili, Sábadu (24/01/2026), iha-ne’ebé iha parte dahuluk ramata ho skor 1-1 ne’ebé elementu Bernard Teye lidera uluk golu prodús husi jogadór Daniel Gayo iha minutu tolu (3) no AS Marca responde iha minutu 27 liuhusi Loise Anselmo.
Notísia relevante: As Marca mehi hakarak impata ho Karketu Dili FC iha Tasa Liga FFTL
Jogadór matak malirin iha parte daruak konsege aumenta golu rua ne’ebé prodús husi jogadór Anzo Correia iha minutu 75 no Yohanes Gusmão iha minutu ikus 90+5.
Enkuantu, jogu entre AD SLB no Aitana FC ramata ho skor 3-0 ne’ebé jogu hala’o iha Estádiu Munisipál Dili, Domingu (25/01/2026), iha-ne’ebé golu tolu referidu prodús iha parte daruak liuhusi jogadór sira hanesan Luís Figo iha minutu 50, Faver Duvan 55 no Filomeno Junior xave vitória ekipa Laulara iha minutu 90+1.
Ho jogu rua referida, rezulta Karketu Dili FC lidera tabela klasifikasaun Grupu D ho pontu tolu, Santa Cruz pontu 0 no AS Marca iha tabela ikus ho pontu 0, enkuantu AD SLB serteja ona hakat bá faze eliminasaun hafoin rekolla pontu haat no lidera tabela klasifikasaun Grupu A, Emanuel FC iha pozisaun daruak ho pontu ida (1) no Aitana FC iha pozisaun ikus ho pontu 0.
Jornalista: Natalino Belo
Editór: Xisto Freitas da Piedade
