DILI, 23 Janeiru 2026 (TATOLI)–Ekipa As Marca mehi hakarak impata ho Karketu Dili Football Club (FC) iha kompetisaun Tasa Liga Federasaun Futeból Timor-Leste (FFTL) 2025 ne’ebé sei hala’o iha Estádiu Munisipál Dili, Sábadu (24/01/2026).
Treinadór As Marca, Francisco de Araújo esplika sira hakarak impata tanba konsidera Karketu Dili FC nu’udár ekipa forte, iha-ne’ebé sai kampiaun Liga Futeból Timor-Leste (LFTL) époka 2025 no posibilidade sai kampiaun iha Tasa Liga FFTL.
“Ami-nia hakarak mak labele lakon, maibé impata natoon ona ba ami,” Treinadór As Marca hateten iha Estádiu Munisipál Dili, Sesta (23/01/2026).
Notísia relevante: Tasa Liga FFTL, FIEL hakarak liki Lica-Lica Lemorai
Francisco relata bainhira FFTL anúnsia atu kria kompetisaun Tasa Liga, As Marca halo preparasaun natoon durante semana rua nune’e bainhira atinje mehi (impata), ne’e konsidera pozitivu ona.
Mezmu nune’e, tuir Francisco, As Marca garante sei hatudu jogu kompetitivu mezmu iha matéria jogadór ne’ebé kualidade natoon no maihusi lokál bainhira kompara ho Karketu Dili FC.
Iha fatin hanesan, Treinadór Karkeitu Dili FC, Bernard Teye hateten nia parte hamutuk ho jogadór entusiazmu kompete iha Tasa Liga FFTL no halo preparasaun másima nune’e garante sei gaña vitória kontra As Marca.
“Ha’u otimista Karketu sei manán,” Teye argumenta.
Entretantu, Ekipa As Marca no Karketu Dili FC hamutuk ho Santa Cruz koloka iha Grupu D. Tasa Liga FFTL partisipa husi klube 13 ne’ebé fahe ba grupu haat.
Jornalista: Natalino Belo
Editór: Xisto Freitas da Piedade
