DILI, 23 Janeiru 2026 (TATOLI)—Ekipa Fitun Estudante Lorosa’e (FIEL) hakarak liki Lica-Lica Lemorai iha jogu dahuluk kompetisaun Tasa Liga Federasaun Futeból Timor-Leste (FFTL) 2025.
Treinadór FIEL, Hermelo José Pereira esplika FIEL preparadu atu kontra Lica-Lica Lemorai mezmu ho preparasaun durasaun mínimu semana-rua no kondisaun klima udan ne’ebé fó influénsia ba kampu maibé iha jogu dahuluk hakarak rekolla pontu tolu ne’ebé sei hala’o jogu iha Estádiu Munisipál Dili, Sábadu (24/01/2026).
“FIEL ho Lica-Lica sempre hasoru malu, maibé ami fiar an sei manán Lica-Lica,” Treinadór FIEL hateten iha Estádiu Munisipál Dili, Sesta ne’e.
Notísia relevante: Tasa Liga FFTL, Portu Taibessi preparadu kontra Coração FC
Iha fatin hanesan, Treinadór Lica-Lica Lemorai, Nélson Soares hateten nu’udár ekipa sempre preparadu hanesan treinu durante semana-tolu atu hasoru ekipa ne’ebé hola-parte iha Tasa Liga FFTL inkluindu FIEL FC.
“Rezultadu minutu 90 mak sei determina,” Nelson Soares subliña.
Entretantu, ekipa FIEL no Lica-Lica kolokadu hamutuk ho rua seluk hanesan Portu Taibessi no Coração FC iha grupu C iha-ne’ebé totál klube 13 ne’ebé fahe ba grupu haat iha Tasa Liga FFTL 2025.
Jornalista: Natalino Belo
Editór: Xisto Freitas da Piedade
