DILI, 02 Fevereiru 2026 (TATOLI)-Deputadu husi Partidu Kongresu Nasionál Rekonstrusaun Timorense (CNRT, sigla portugés), Deputadu Domingos Augusto ‘Deker’, apela ba povu Ermera hotu atu kontribui ba iha prosesu konstrusaun estrada ne’ebé Governu lansa ona.
Deputadu ne’e mós reprezenta povu Ermera nia lian agradese ba Governu Dasiak ne’ebé halo ona lansamentu fatuk dahuluk ba estrada urbana Glenu no bá Letefoho.
“Aproveita tempu ne’e hakarak apela ba povu Ermera katak Governu Dasiak kumpri ona nia devér hodi fó resposta ba ita-nia prokupasaun no ezijénsia. Husu ba Ermera oan sira tenke kontribui ba prosesu konstrusaun estrada la’o ho efetivu”, nia hato’o iha reuniaun plenária Parlamentu Nasionál, ohin.
Tuir nia, povu iha direitu atu ezije estrada di’ak, maibé iha devér no responsabilidade atu kontribui. “Presiza hatene katak oportunidade dezenvolvimentu mai dala-ida de’it, sei la mai beibeik, tanba Governu tenke tau-matan ba munisípiu hotu la’ós ba Ermera de’it. Ne’e duni ita tenke simu ho liman rua no ho responsabilidade”, nia hato’o.
Iha fatin hanesan, deputada CNRT, Cedelízia Faria dos Santos, kongratula Governu ne’ebé responde ona ba preokupasaun komunidade nian no hein katak prosesu konstrusaun bele la’o lais ona.
Lembra katak, iha 26 Janeiru, Governu lansa ofisialmente projetu konstrusaun estrada urbana Glenu no estrada Glenu-Letefoho.
Projetu estrada ne’e kobre dalan husi Letefoho (km 30+230) to’o Glenu (km 54+370), ho númeru kontratu Konkursu/191/MOP-2024, sei halo konstrusaun durante loron 365 ho orsamentu $38.800.054, ne’ebé implementa husi China Civil Engineering Construction Corporation.
Aleinde ne’e, Projetu Estrada Urbana Glenu no sistema drainajen mós sei kontrui ho pakote rua ho durasaun tinan ida. Pakote ida ho orsamentu $2.640.762,21 no pakote rua ho orsamentu $3.214.929,67, ne’ebé sei implementa husi empreza Shabryca Construction Unip. Lda.
Notísia relevante: https://tatoli.tl/2026/01/26/governu-ofisialmente-lansa-projetu-estrada-urbana-glenu-no-glenu-letefoho/
Jornalista: Nelson de Sousa
Editora: Maria Auxiliadora
