DILI, 09 Fevereiru 2026 (TATOLI)—Jogu meiu finál Tasa Liga Federasaun Futeból Timor-Leste (FFTL) 2025 volta dahuluk sei realiza iha semana-ne’e ne’ebé sei kompete entre ekipa haat ne’ebé sei hala’o iha Estádiu Munisipál Dili.
Diretór Kompetisaun Eventu FFTL, João Campos esplika hafoin faze kualifikasaun grupu ramata iha horisehik (08/02) entre Karkeitu Dili FC no Santa Cruz rezulta ona ekipa haat hanesan Emanuel FC, Assalam, Portu Taibessi no Karketu Dili FC sei kompete iha faze meiu finál.
“Kompetisaun ne’e laiha kampiaun terseiru lugár maibé iha faze meiu finál sei deside de’it kampiaun primeiru no segundu lugár iha finál,” João Campos informa ba TATOLI iha ninia kna’ar fatin, Bairros dos Grilos, Segunda ne’e.
Campos relata, tuir oráriu, jogu volta dahuluk sei hala’o entre Emanuel FC no Portu Taibessi iha loron-Sábadu (14/02/2026) no ekipa rua seluk hanesan Assalam FC sei kontra Karketu Dili FC iha loron-Domingu (15/02/2026).
Enkuantu, volta daruak Portu Taibessi Vs Emanuel sei kontinua iha loron-Sábadu (21/02/2026) no Karketu Dili FC sei realiza iha loron-Domingu (22/02/2026) hodi deside ekipa rua hakat bá finál ne’ebé tuir oráriu sei realiza iha loron-Sábadu (28/02/2026).
Entretantu, FFTL rasik sei prepara prémiu orsamentu rihun $35 no tasa ba ekipa kampiaun husi klube haat (4) ne’ebé sei kontinua kompete iha faze meiu finál.
Jornalista: Natalino Belo
Editór: Xisto Freitas da Piedade
