DILI, 09 Fevereiru 2026 (TATOLI)—Komisaun Rekrutamentu ba vaga membru Polísia Nasionál Timor-Leste (PNTL) 2025 deside atu halo adiamentu teste médika ba aplikante sira tanba ekipamentu ne’ebé atu utiliza halo teste iha Laboratóriu Nasionál Ospitál Nasionál Guido Valadares (HNGV) laiha.
Portavós Komisaun Rekrutamentu, Superintendente Polísia António da Luz, informa, tuir loloos prova médiku ba aplikante sira hala’o iha Tersa (10/02) to’o Sesta (20/02), maibé iha ekipamentu balun laiha.
“Iha semana kotuk liubá fó sai ona ba públiku katak iha loron 10 ne’e ita sei hala’o teste médiku ba kandidatu 400 pessoa, maibé depoizde parte Departamentu Saúde halo koodenasaun ho Laboratóriu Nasionál Ospitál Nasionál Guido Valadares, ba konfirma katak ekipamentu ne’ebé halo teste reazente to’o agora seidauk iha. Tanba ne’e mak aproveita biban ida-ne’e atu fó sai ba públiku, liuliu ba kandidatu sira atubele hein to’o ekipamentu ne’e to’o ona, ami sei informa filafali ba ita-boot sira atu mai tuir teste saúde,” Portavós hato’o ba Jornalista sira liuhusi konferénsia imprensa ne’ebé mak hala’o iha Sentru Formasaun Polísia, Komoro, Segunda ne’e.
Nune’e, Komisaun adia teste médiku ba kadetes 400 ne’e sein definisaun data tanba sei hein husi parte Laboratóriu.
“Ita tenke hein parte Laboratóriu, tanba la’ós ita mak halo ekipamentu ne’e no sosa aimoruk, tanba liuhusi Laboratótriu Nasionál, ita hein bainhira ekipamentu ne’e mai mak sei anúnsia ba públiku. Espera katak tempu badak mai ona, labarik sira ne’e bele halo teste,” nia akresenta.
Notísia relevante : Aplikante ba vaga membru PNTL foun hato’o keixa ba PDHJ
Komisaun kontinua mantein fó teste médiku ba aplikante 400 ne’ebé naran sai ona iha semana kotuk no tuir Rezolusaun Governu númeru 10/2025.
“Ba sira ne’ebé teste médiku ne’e komisaun rekrutamentu mantein nafatin númeru 400 ne’e kontinua avansa ba teste médiku. Sim, ida-ne’e mak ita kontinua, tanba bazeia ba Rezolusaun Governu númeru 10/2025 ne’ebé maka fó sai vaga ne’ebé presiza 400 pessoas, ida-ne’e mak ita mantein nafatin,” nia katak.
Iha fatin hanesan, Xefe Departamentu Saúde Komandu Polísia Nasionál, Analita do Rêgo, hateten, presiza hein fasilidade balun husi rai-li’ur.
“Ita tenke halo mudansa ba oráriu, PNTL nu’udar institusaun Estadu, ami hein de’it bainhira reazente to’o iha ne’e ami bele fó hatene data fiksu fali ba públiku,” nia katak.
Fasilidade ne’ebé uza atu halo teste ba kandidatu sira mak ho reazente hanesan Complete Blood Count (CBC), kímiku ho serolojia.
“Ami seidauk hatene data fiksu, tanba konkursu ba ekipamentu sira ne’e husi rai-li’ur, entaun kuandu to’o sira sei fó hateten ba ami, maka ami sei anúsiu ba ita-boot sira ,” nia tenik.
Jornalista : Natalino Costa
Editora : Julia Chatarina
