VIKEKE, 09 Fevereiru 2026 (TATOLI)—Ministériu Agrikultura Peska, Pekuária no Floresta (MAPPF) destaka ekipamentu pezadu (eskavatór) ida iha Postu Administrativu Lakluta, Munisípiu Vikeke hodi apoiu povu agrikultór normaliza irrigasaun ba natar iha Ai-Tara.
Xefe Suku Uma-Tolu, Eduardo Soares haktuir natar Ai-Tara ektare barak abandonadu tanba kondisaun irrigasaun aat.
“Ekipamentu ne’e ita hetan apoia husi MAPPF hodi fasilita ami hodi normaliza irrigasaun ba natar parte área Ai-Tara. Husi apoia ekipamentu ida-ne ne’e bázeia ba ami-nia pedidu husi suku haat hamutuk ho administradór Postu Lakluta,” Eduardo Soares ba TATOLI iha Postu Lakluta, Tersa ne’e.
Nia relata natar ne’ebé lokaliza iha área Ai-Tara ho totál hamutuk ektare 146. Husi númeru ne’e, natar ektare 56 ativa, maibé ektare hamutuk 90 abandonadu.
Eduardo dehan bee ba irrigasaun natar Ai-Tara ne’e kanaliza husi mota Dilór ne’ebé sei halo normalizasaun ho distánsia purvolta 1.000.00 hahú husi mota bá natar.
“Normalizasaun ida-ne’e populasaun agrikultór sira mak apoia servisu no apoia ai-han ba ita-nia operadór sira. Enkuantu, ekipamentu ne’ebé daudaun ne’e destaka iha Ai-Tara sei mantein ne’ebá to’o irrigasaun ne’e di’ak,” nia subliña.
Eduardo esplika normalizasaun irrigasaun ba natar Ai-Tara bainhira di’ak sei fó benefísiu ba povu suku haat iha Postu administrativu Lakluta tanba natar referidu poténsia ba hare.
Tuir dadus, populasuan Postu Lakluta iha suku haat kompostu husi Suku Dilór, Uma-Tolu, Ahik no Laline, ho totál abitante hamutuk 8.123 husi totál uma-kain 1.907.
Jornalista: Vitorino Lopes da Costa
Editór: Xisto Freitas da Piedade
