DILI, 09 Fevereiru 2026 (TATOLI) – Ministru Komérsiu no Indústria, Filipus Nino Pereira, simu vizita ida husi Kónsul Jerál Dezignadu Repúblika Maldivas, Bobby Mohanty, hodi aborda kona-ba kooperasaun investimentu potensiál entre Timor-Leste, Índia, no Maldivas.
Durante sorumutu ne’e diskute área prioridade lima mak hanesan halo investimentu iha Timor-Leste iha setór mina no gás, minerasaun no minerál, ensinu superiór, seguru, no agrikultura/prosesamentu ai-han.
Bobby Mohanty subliña kona-ba petroleu no gás nian posibilidade husi empreza sira ne’ebé iha ligasaun ho Governu indianu hodi apoia esplorasaun petróleu no gás Timor-Leste nian.
Enkuantu, ba área oportunidade sira iha dezenvolvimentu mineiru no minerál sira konsidera boot, presiza dadus adisionál ba revizaun liután.
Iha domíniu edukasaun, Bobby Mohanty propoin atu estabelese Fakuldade Medisina no Enjeñaria, hodi konsidera semellansa iha kurríkulu entre Índia no Timor-Leste ne’ebé bele apoia interkámbiu akadémiku no aprendizajen sirkulár entre estudante no dosente sira husi nasaun rua ne’e.
“Estudante sira ne’ebé hetan graduasaun iha Timor-Leste bele serbisu iha ne’e durante tinan ida molok fila ba Índia. Ida ne’e sei kria relasaun ida ne’ebé fó benefísiu ba malu”, Bobby Mohanty hateten hafoin enkontru.
Kona-ba área Seguru nian, Kónsul Mohanty destaka área ida-ne’e iha poténsia ne’ebé signifikativa, haree ba falta empreza seguru sira ne’ebé hala’o operasaun iha Timor-Leste.
Iha setór haki’ak manu, partikularmente produsaun manu-tolun, no prosesamentu ai-han, konsidera estratéjiku atu apoia diversifikasaun ekonómika no substituisaun importasaun.
Nia subliña katak diskusaun sira seluk mak importánsia atu dezenvolve Estadu industriál sira no zona ekonómika espesiál sira hodi atrai investimentu, inklui dezenvolvimentu agroindústria sira no indústria prosesamentu ai-han sira.
Bobby Mohanty afirma katak nia eskritóriu hala’o ona fórum negósiu iha Singapura no Delhi hodi fornese informasaun detalla kona-ba oportunidade investimentu iha Timor-Leste, inklui liuhusi TradeInvest.
Ministru Nino Pereira reafirma kompromisu Governu nian atu apoia investidór sira liuhusi polítika relevante no kolaborasaun ho TradeInvest hodi fó informasaun detalla kona-ba setór potensiál sira.
Tuir nia, parte rua konkorda atu kontinua diálogu, fahe dadus, no esplora pasu konkretu sira hodi hametin lasu ekonómiku sira.
Jornalista: Arminda Fonseca
Editora: Maria Auxiliadora
