KOVALIMA, 10 Fevereiru 2026 (TATOLI) – Ajénsia Munisipál Fiskalizasaun (AMF) Kovalima identifika, iha tinan-2024 to’o 2025, Sekretáriu Munisipál, Diretór Munisipál ho funsionáriu sira balun uza veíkulu Estadu hanesan karreta ho motorizada fora husi oras servisu.
Ajénsia Munisipál Fiskalizasaun hala’o fiskalizasaun ho objetivu atu garante Jestaun Administrasaun di’ak ba rekursu finanseiru , Patrimóniu no ekipamentu iha servisu administrasuan públika hodi prevene no deteta irregularidade no inkumprimentu aktu disiplina sira no prátika korrupsaun hodi bele promove efisénsia no efikasia iha servisu administrasaun Públika.
“Utilizasuan veíkulu Estadu hanesan motorizada no karreta fora husi oras servisu mak hanesan Sekretáriu Servisu Munisipál nain-tolu no Diretór Servisu munisipál, xefe Departamentu, funsionáriu barak mak ami identifika,” Diretór Ajénsia Munisipál Fiskalizasaun (AMF), Anacleto Martins, fó sai bainhira aprezenta rezultadu avaliasaun servisu Autoridade 2025, liuhusi reuniaun Konsellu Koordenasaun Munisipál, iha salaun AMC-Suai, ohin.
Dirijente ne’e dehan, Ajénsia fiskalizasaun aprezenta dadus ne’e relasiona ho iha 2024 ne’e hamutuk ho Diretasaun Transporte no Komunikasaun,Polisia Tránzitu identifika iha terreñu.
“Ami identifika la’os nonook de’it, maibé aprezenta relatóriu ba Prezidete Autoridade Kovalima hodi fó sirkulár, maibé nafatin uza veikulu Estadu fora husi oras servisu ni’an”, nia lamenta.
Bazeia baDekretu-Lei númeru 34/2005, 15 Ourobru ne’ebé altera ba Dekretu-Lei númeru 84/2023, 23 Novembru, sestu alterasaun Dekretu-Lei númeru 3/2016,16 Marsu hodi aprova estatutu administrasaun munisipál, autoridade munisipál, grupu tékniku desentralizasaun administrativa ne’ebé hatur ona iha artigu 58 iha alinea 1-4. Diploma Ministeriál númeru 85/2023 , 29 Dezembru iha artigu 50 no 60 iha alinea A-M.
Iha biban hanesan, Diretór Ajénsia Munisipaál no Planeamentu, Afonso Nugueira Nahak fó hanoin katak labele uza veikulu Estadu fora husi oras servisu.
“Ha’u husu favór ida ita boot sira ne’ebé halo atividade fora husi oras tenke rai karreta no motorizada no labele utiliza veikulu Estadu hodi ba antar-jemput tanba ita prevee ona orsamentu ba ita hotu hanesan $100 ba Diretór sira, Xefe Departamentu $75 ba funsionáriu permanente ho ajente $25 atu osan transporte,”nia dehan.
Orsamentu Jerál Estadu 2026 hamutuk 9,517.979 ne’ebé preve ba salariu no vensimentu $ 2.203.227, bens no servisu $ 841.730,transferensia $4.061.558, kapitál menór rihun $300 no kapitál dezenvolvimentu $2.111.464
Jornalista: Celestina Teles
Editór: Florencio Miranda Ximenes
