KOVALIMA, 10 Fevereiru 2026 (TATOLI) – Administradór Postu Administrativu (APA) Zumalai-Kovalima, Alipio Magno, husu Diretora Servisu Munisipál atu kontinua fasilita formasaun ba funsionáriu apoiu suku sira hodi prenxe livru iha suku sira.
“Ha’u observa ita-nia funsionáriu na’in haat nafatin falta koñesimentu oinsá atu prense livru, maske hetan ona formasaun, maibé formasaun ne’e la sufisente entaun kontinua fasilita formasaun ba sira,” Administradór Postu Administrativu Zumalai,Alipio Magno hato’o iha Salasaun AMC.
Realidade hatudu bainhira Administradór rasik vizita iha suku Fatuleto, maibé funsionáriu sira la fó livru ba administradór atu prenxe.
Iha Sorin seluk, Diretór Ajénsia Munisipál Fiskalizasaun, Anacleto Martins, mós avalia servisu funsionáriu na’in’haat ne’ebé maka destaka iha suku 30 hatudu iha suku balun laiha ona livru A4 hodi rejista karta sai no tama, rejista populasaun temporáriu, laiha livru A1 hodi prenxe desizaun suku ni’an, livru B3 kona-bá dadus mudansa populasaun temporáriu.
Aleinde ne’e mós identifika ofisiál sira tama servisu maibé la asina lista prezensa, funsionáriu ofisiál suku balun rai komputadór iha nia uma privadu, laiha printer hodi fasilita sira hala’o sira-nia servisu tanba printer aat ona no problema seluk tan.
Tuir dadus funsionáriu ne’ebé mak destaka hodi apoiu servisu administrasaun iha Suku iha munisípiu Kovalima ne’e hamutuk 120, tanba kada suku destaka funsionáriu na’in haat mak hanesan, Sekretáriu Administrasaun Suku,Ofisial Finansa,Ofisiál Administrasaun no Ofisiál asuntu sosiál iha suku hodi koloka ba iha suku 30 ne’ebé pertense ba munisípiu Kovalima.
Hatan ba kestaun ne’e, Diretora Servisu Munisipál Apoiu Organizasaun Noun Governamentál no Organizaun Komunitária, Maria de Jesus Perreira klarifika, Funsionáriu apoiu sosiál husi suku mak seidauk fasilita formasaun, maibé sira seluk ne’e tuir ona formasaun .
“Ami iha duni planu atu fasilita formasaun ba funsionáriu apoiu suku sira maibé sei hein orsamentu husi trimestre ba dahuluk , tanba ami seidauk fasilita formasaun. Funsionasiu sira la’ós la hatene prense livru ne’e informasaun laloos livru barak mak prense ona , maibé livru 18 mak seidauk prense duni, “nia dehan
Bazeia ba planu ne’e atu fasilita formasaun de’it ba ofisial suku iha asuntu sosial tanba durante ne’e sira seidauk hetan formasaun , maibe funsionariu apoiu suku hanesan Sekretáriu Administrasaun Suku,Ofisial Finansa,Ofisiál Administrasaun tuir ona formasaun iha 2025 ne’e.
Jornalista: Celestina Teles
Editór: Florencio Miranda Ximenes
