DILI, 10 Fevereiru 2026 (TATOLI)–Jogu jornada 12⁰ primeira divizaun Liga Futeból Femininu Timor-Leste (LFFTL) entre Buibere Football Club no Akadémika, rezulta Buibere manán ho skor 2-1, enkuantu Kulugisa sofre golu 18-0 husi S’amuser FC.
Jogadóra Buibere FC hanesan Natácia Pereira no Novénia Gabriela sai eroina liuhusi prudús golu rua iha minutu 22 no 54 bainhira kontra Akadémika ne’ebé hala’o iha Kampu Federasaun Futeból Timor-Leste (FFTL), Bairros dos Grilos, Sesta (06/02/2026).
Akadémika FC konsege responde ho golu ida liuhusi jogadora Devi Safitri iha minutu 28 maibé labele salva elementu Marnivio Santa husi derrota, nune’e rezulte okupa iha pozisaun daneen (6) ho pontu 13.
Buibere FC mantein iha pozisaun datoluk (3) ho totál pontu 29, rezultadu manán jogu ualu (9), impata rua (2) no derrota ida (1).
Iha fatin hanesan, Kulugisa kontinua derrota bainhira kontra ekipa forte S’amuser FC ho skor 18-0, Sábadu (07/02/2026), iha-ne’ebé golu hitu enxe husi jogadora Letícia Soares iha minutu 15, 20, 21, 37, 42, 45 no 53.
Jogadora Cherlin Sarmento rekolla golu haat iha minutu 10, 35, 50 no 86, Nívia Guterres prodús golu tolu iha minutu 70, 71 no 77, golu rua husi Suzana Soares minutu 39 no 81, enkuantu golu rua seluk husi jogadora Juleica da Costa iha minutu 43 no 76.
Ho rezultadu jogu referidu, lori S’amuser kontinua lidera primeira klasifikasaun LFFTL ho pontu 34 hafoin manán jogu 11 no impata ida (1), enkuantu Kulugisa FC mantein iha zona dezpromovida ho pozisaun sanulu (10), rezultadu derrota iha jogu 12.
Jornalista: Natalino Belo
Editór: Xisto Freitas da Piedade
