DILI, 10 Fevereiru 2026 (TATOLI)-Prezidente Komisaun Nasionál Eleisaun (CNE, sigla portugés), José Agostinho da Costa Belo, husu ba partidu polítiku sira atu halo kongresu no konferénsia nasionál hodi prepara ba hasoru eleisaun prezidensiál ne’ebé sei realiza iha tinan 2027.
Nia esplika katak iha Lei Partidu Polítiku hateten klaru katak, tuir idaidak nia estatutu, balun iha tinan haat no lima, antes tama ba eleisaun prezidensiál no parlamentár obrigatóriu halo kongresu no konferénsia hodi iha direitu partisipa iha eleisaun mai.
Hodi dehan liuhusi konferénsia no kongresu mak dalan ida atu reestrutura partidu katak, forsa polítika ne’e ho kontestu demokrátiku plularizmu sai hanesan modelu ida bele reprezenta valór demokrasia. Tanba ne’e, desizaun presiza liuhusi kongresu hodi deside ka hili líder topu hahú husi Prezidente, Sekretáriu-Jerál ho ninia estrutura tomak.
Nune’e iha lejitimidade legál ho polítiku hodi konkorre ba eleisaun sira ne’ebé mai, hanesan eleisaun prezidensiál, tanba mandatu Prezidente Repúblika atuál sei termina iha 2027.
“Sei iha eleisaun ba prezidensiál, partidu sira ne’ebé sente hakarak konkorre, fó konfiansa ba lideransa partidu ka indivíduu ne’ebé sira haree liuhusi kongresu mak deside”, nia hateten ba Tatoli iha knaar fatin, Kolmera, ohin.
CNE rejista partidu hamutuk 10-resin ne’ebé inklui ho partidu lima ne’ebé daudaun hetan asentu iha Parlamentu mak hanesan Partidu Frente Revolusionária Timor-Leste Independente (FRETILIN), Partidu Kongresu Nasionál Rekonstrusaun Timorense (CNRT, sigla portugés), Partidu Demokrátiku (PD), Partidu Libertasaun Populár (PLP), no Partidu Kmanek Haburas Unidade Nasional Timor Oan (KHUNTO).
“Ami rejista Partidu Demokrátiku, CNRT no balun tan sira seidauk halo kongresu, tanba posibilidade, tinan ne’e nia laran tenke halo”, nia dehan.
Iha parte seluk, CNE mós akompaña hela konsolidasaun husi partidu polítiku sira ne’ebé daudaun la’o iha baze hodi nafatin tuir regra ne’ebé iha.
CNE mós iha programa vizita bá partidu polítika sira-nia sede hodi halo edukasaun sívika tanba autór ne’ebé atu konkorre iha eleisaun sira mai ne’e mak partidu no sira mak sei forma ninia kuadru importante sira.
Jornalista: Nelson de Sousa
Editora: Maria Auxiliadora
