DILI, 10 Fevereiru 2026 (TATOLI) – Institutu Jeosiénsia Timor-Leste (IGTL, sigla portugés), ne’ebé tutela ba Ministériu Petróleu no Rekursu Minerál (MPRM), aloka iha kada tinan orsamentu rihun $300 hodi selu fatin aluger iha City 8, ne’ebé kada fulan selu rihun $25.
Prezidente IGTL, Job Brites, hateten dezafiu ida-ne’ebé daudaun sira hasoru mak laiha fatin própriu ba sira hodi hela atu halo serbisu no kada fulan tenke hasai osan hodi selu fatin aluger.
“To’o agora ami laiha edifísiu no laboratóriu. Daudaun ami aluga fatin iha City 8, kada fulan selu rihun $25”, Job Brites dehan.
Tanba edifísiu própriu ba IGTL seidauk iha maka sira halo esforsu no daudaun Governu atribui ona fatin iha Kaikoli, iha Ministériu Solidaridade Sosiál no Inkluzaun nia kotuk ne’ebé nia dezeñu detalladu iha ona no tinan sei lansa ba konkursu públiku, nune’e bele hahú konstrusaun.
Dirijente ne’e esplika katak edifísiu aluger hanesan solusaun temporária, atu garante kontinuidade serbisu tékniku no servisu públiku institusaun nian. Prosesu aluger ne’e hala’o tuir prosedimentu aprovizionamentu no finanseiru ne’ebé aplikavel, bazeia ba referénsia merkadu ba edifísiu hanesan, no ho konsiderasaun ba efisiénsia kustu no nesesidade operasionál.
Hodi salienta katak meiu ida-ne’e la substitui planu longu-prazu atu dezenvolve edifísiu no laboratóriu jeosiénsia permanente, ne’ebé kontinua sai prioridade estratéjika institusaun nian. Hanesan institusaun públika, IGTL reafirma nia kompromisu ba transparénsia no responsabilidade, no informasaun finanseira detallada, sei trata liuhusi mekanizmu relatóriu no fiskalizasaun ofisiál, tuir regulamentu nasionál.
Ba kestaun ne’e, Ministru Petróleu no Rekursu Minerál, Francisco Monteiro, admite katak daudaun instituisaun lima ne’ebé tutela ba ministériu seidauk iha fatin, nune’e kada tinan tenke prevee orsamentu ho montante boot hodi selu fatin aluger sira.
Instituisaun lima ne’e mak Autoridade Nasionál Petróleu (ANP), Timor Gás no Petróleu, Empreza Públika (Timor GAP, E.P), IGTL, Autoridade Nasionál Mineiru (ANM), no Murak Rai Timor. Instituisaun lima ne’e daudaun aluga fatin iha Timor Plaza no City 8, ne’ebé kada fulan selu montante osan ne’ebé la hanesan bazeia medida fatin ne’ebé sira uza.
Kestiona kona-ba informasaun ne’ebé fó sai iha públiku katak Timor GAP tenke hasai osan rihun $70 iha kada fulan hodi selu fatin aluger, governante ne’e rekoñese katak montante ne’e loos.
“Ami nafatin iha komunikasaun halo esforsu, daudaun instituisaun balun hanesan IGTL iha tiha alokasaun terrenu ida iha Ministériu Solidaridade nia kotuk, no iha ideia boot ida-ne’ebé ministériu promove hela katak iha futuru depoiz dezenvolvimentu kosta súl ne’e ami hakarak atu muda ministériu totalidade ka inklui instituisaun tutela sira ba kosta súl”, Francisco Monteiro informa.
Relasiona ho montante osan ba fatin aluger sira, Tatoli tenta halo aprosimasaun ba instituisaun relevante sira atu hetan dadus loloos kona-ba orsamentu ne’ebé prevee iha kada tinan ba selu fatin, maibé balun seidauk fó informasaun.
Jornalista: Arminda Fonseca
Editora: Maria Auxiliadora
