VIKEKE, 10 Fevereiru 2026 (TATOLI)–Reprezentante Populasaun Olobai, Suku Karaubalu, Postu Administrativu Vikeke Vila, Munisípiu Vikeke, Duarte Sarmento Fernandes, haktuir durante tinan rua ona populasaun iha área Olobai hanesan Aldeia Wesá, Suku Karaubalu, Postu Administrativu Vikeke Vila, enfrenta difikuldade ba bee-moos.
“Kuaze tinan rua ona ami enfrenta difikuldade liubá bee-moos. Nune’e, ami bá duni iha parte responsavel bee-moos nian hanesan BTL, E.P. hodi ko’alia ami-nia preokupasaun ne’e ba sira, maibé seidauk iha resposta,” Duarte Sarmento Fernandes ba jornalista sira iha Olobai, Tersa ne’e.
Nia aprofunda, nu’udar sidadaun Timor-Leste, populasaun presiza bee-moos hodi asesu.
“Tan ne’e, ha’u lori populasaun nia aspirasaun hakarak hato’o ba parte relevante sira katak karik bele atende ami-nia halerik sira-ne’e tanba kada loron ami asesu de’it bee-moos husi posu rua ne’ebé lokaliza iha área Olobai. Nune’e, bainhira ami bá kuru ka liga tenke ense pulsa eletrisidade $5, maibé komunidade ne’ebé laiha kibi’it tenke kuru bee-moos iha mota,” nia hato’o.
Hatán ba preokupasaun ne’e, Koordenadór BTL, E.P. Munisípiu Vikeke, Marito da Costa, hateten, kona-ba preokupasaun parte komunidade área Olobai ne’e, BTL, E.P. distribui bee bá ne’ebá maibé abitante balun mak laiha konxiénsia utiliza bee, entaun afeta ba komunidade iha área Olobai la asesu bee-moos.
“Ami sempre distribui bee ba komunidade Olobai, maibé ita-nia abitante balun mak laiha konxiénsia hodi hamate ita-nia maluk sira. Tanba ita-nia abitante sira loke bee tuir sira-nia hakarak, entaun difikulta distribuisaun bee ba komunidade hanesan iha área Olobai. Ami daudaun ne’e prepara ona kontadór ba área Olobai hodi instala, atu bee bele kobre hotu iha área Olobai,” nia esplika.
Marito dehan, tempu badak, BTL, E.P. Munisípiu Vikeke sei alarga kontadór ba área Olobai ho totál uma-kain hamutuk 117. Bainhira monta ona kontadór ema sei poupa bee no komunidade ne’ebé la asesu bee sei asesu filafali.
Jornalista: Vitorino Lopes da Costa
Editór: Xisto Freitas da Piedade
