DILI, 10 Fevereiru 2026 (TATOLI)–Ministériu Edukasaun (ME), Segunda ne’e, fasilita formasaun kona-ba informasaun teknolojia ba inspetór eskolár sira hosi Munisípiu Ainaru no Bobonaru.
Objetivu hosi formasaun ne’e atu hasa’e koñesimentu oinsá utiliza teknolojia iha era ida modernu. Formasaun ida-ne’e importante no presiza oferese ba inspetór eskolár.
“Formasaun ida-ne’e ba uluk Munisípiu Ainaru no Bobonaru. Ita halo fazeadamentu. Ita labele halo dala ida. Tanba formasaun ida-ne’e esensiál presiza kontinuidade. Nune’e, sira bele komprende di’ak kona-ba saida mak formadór sira fó,” nia dehan ba jornalista sira iha salaun Ian Martin, Balide, Tersa ne’e.
Tanba ligadu ho sustentabilidade ba formasaun, membru Governu ne’e aprezenta, durante ne’e eskola sira utiliza tablet hodi atualiza informasaun sira loron-loron.
Entretantu, durante ne’e, ministériu atribui ona tablet hamutuk 133 ba superientendente no inspetór eskolár sira.
Iha fatin hanesan, Diretór Inspesaun Jerál Ministériu Edukasaun Interinu, atuál Sub-Inspetór Administrasaun Finansa, Jeremias Gomes, esplika objetivu prinsipál husi formasaun ne’e mak oinsá utiliza sistema KoboCollect ho efisiénsia no efetivu.
“Ida-ne’e atu ajuda ita-nia inspetór eskolár sira oinsá utiliza sistema dijitál ida ho naran KoboCollect, ho maneira ne’ebé efetivu no efisiente atu garante implementasaun inspesaun rutina nune’e bele implementa ho di’ak tuir duni manuál inspesaun nian, oinsa rekolla informasaun no evidénsia bazeia ba faktu hodi garante desizaun ne’ebé ba duni nia objetivu hodi hadi’a kualidade ensinu iha futuru,” nia esplika.
Nia hatutan programa referidu faze primeiru implementa ona iha tinan-2025 iha munisípiu Dili, ne’ebe hatudu katak plataforma dijitál ne’e di’ak tebes.
“Ba tinan 2026, programa ne’e sai nu’udár sub-programa importante ida ba inspesaun eskolár, hodi eleva kualidade edukasaun iha nivel ensinu hotu iha Timor-Leste, hodi asegura katak kada eskola, kada saladeaula, no kada estudante hetan benefísiu husi servisu inspetoria nian ne’ebé profisional, suporta husi teknolojia modernu iha sékulu 21 ida -ne’e,” Jeremias dehan.
Nia relata matéria ba formasaun referida mak plataforma online KoboCollect, atu fasilita servisu rutina inspetór sira eskola hodi halo observasaun no kontrola fasilidade eskola.
Entretantu, formasaun faze terseiru sei implementa ba Munisípiu Ermera no Lautein ne’ebe sei akontese iha 25 Fevereiru tinan ne’e.
Formasaun ba inspetór eskolár ne’e hahú ohin to’o iha 12 Fevereiru no sei kontinua ho inspetór eskolár hosi Munisípiu Lautein ho Ermera. Totál inspetór eskolár ne’ebé tuir formasaun hamutuk 42, inklui ona ho faze dahuluk.
Jornalista: Osória Marques
Editór: Xisto Freitas da Piedade
