DILI, 10 Fevereiru 2026 (TATOLI)—Sekretária Estadu Formasaun Profisionál no Empregu (SEFOPE) hamutuk ho Programa Nasaun Unida ba Dezenvolvimentu (PNUD) ofisialmente lansa portál servisu SIMU-Web.
Lansamentu portál ne’e importante hodi haforsa servisu dijitál empregu nian no mellora asesu ba informasaun kona-ba merkadu traballu iha Timor-Leste. Plataforma ne’e mós hasa’e uzabilidade, asesibilidade no funsionalidade hodi fornese esperiénsia ida-neʼebé efisiente no amigavel liu ba utilizadór, ba ema sira-ne’ebė buka serbisu no empregadór sira.
Diretór Ezekutivu SEFOPE, Paul Alves, hateten serimónia ohin ne’e importante tebes hodi lansa plataforma ne’e, tanba Timor-Leste tama ona ASEAN nune’e tenke adapta ho sistema teknolojia, entaun portál ida-ne’e bele ajuda ema buka servisu no formasaun ruma ho lalais no fasíl.
“Uluk ita halo atendimentu ho manuál maibé agora ho maneira teknolojia loke de’it rede internet ema hotu bele aplika kampu traballu iha área oioin ho empregadór sira liuhusi online,” nia informa ba jornalista sira iha CFP, Bekora, ohin.
Nia hatutan, plataforma ne’e tuan hahú halo iha tinan 2024 maibé moderniza fali katak uluk prosesu rejistrasaun ne’e halo husi SEFOPE maibé agora ema ida-idak bele aplika no rejistu rasik área servisu ne’ebé sira hakarak iha portál online ida-ne’e.
“Tanba ne’e mak lori Governu Timor-Leste nia naran hakarak hato’o agradese ba Governu Korea liuhusi Koica,” nia hateten.
Nia garante katak plataforma ne’e sei hetan seguransa másimu husi TIC-Timor tanba sira mós servisu parséria ho ajénsia refere atu ajuda asegura seguransa ba plafatorma SIMU-Web, nune’e SIMU-Web bele kontribui maka’as hodi hametin servisu empregu nasionál sira liuhusi apoia korrespondénsia serbisu neʼebé efetivu no reforsa lideransa institusionál SEFOPE nian iha jestaun sistema empregu dijitál sira.
Reprezentante UNDP iha Timor-Leste, Katyna Argueta, afirma serimónia entrega portál SIMU-Web importante ida ne’e hanesan pasu importante ida ba Timor-Leste hodi dezenvolve indústria ho tranformasaun dijitál ne’ebé mak di’ak ba empregu no empregadór sira iha Timor-Leste.
“Nune’e, espasu ida ne’e la’ós ko’alia de’it kona-ba dijitál maibé atu hametin ita-nia kooperasaun servisu no fó oportunidade ba joven sira kria empregu ba sira-nia an,” nia dehan.
Tanba Timor-Leste hanesan nasaun foun ne’ebé dinámiku tebes iha populasaun ba kontribuisaun dezenvolvimentu no mós asesu ba informasaun merkadu laborál, entaun ho portál ida-ne’e bele responde no fasíl tebes ba joven sira hodi asesu formasaun kona-ba servisu nian.
“UNDP kontente tebes bele servisu hamutuk ho SEFOPE hodi realiza plataforma ida-ne’e no fiar katak plataforma ne’e bele transforma joventude sira iha Timor-Leste ho di’ak liután,” nia hateten.
Implementasaun portál ida-ne’e finánsia husi Ajénsia Kooperasaun Internasionál Korea (KOICA) Ministériu Konérsiu Indústria no UNDP Timor-Leste.
Jornalista : Alexandra da Costa
Editór : Cancio Ximenes
