DILI, 11 Fevereiru 2026 (TATOLI)—Autoridade Munisipál Baukau (AMB) liuhusi ekipa konjunta kontinua halo preparasaun ba serimónia lansamentu hatuur fatuk dahuluk ba projetu modernizasaun merkadu Tuanau ne’ebé sei realiza iha aban, Sesta (12/02/2026).
Xefe ekipa konjunta atuál Sekretáriu Munisipál Planeamentu Investimentu no Dezenvolvimentu (PIDI), Eduardo Filipe Ximenes, esplika ekipa konjunta kompostu husi Diresaun Serbisu Munisipál Jestaun Merkadu, Saneamentu, Bombeiru hamutuk ho ekipa Ministériu Komérsiu no Indústria (MKI) no kompañia implementadór oras ne’e hala’o preparasaun ba lansamentu.
“Ita halo ona preparasaun hanesan limpeza no aban sei halo lansamentu primeira pedra ba iha merkadu munisipál ne’e,” Sekretáriu Munisipál Eduardo Filipe Ximenes informa ba TATOLI liuhosi telefónema, Kuarta ne’e.
Eduardo Ximenes relata projetu modernizasaun merkadu munisipál Tuanau importante tanba responde ona ezijénsia husi negosiante ne’ebé sei kompleta kedas fasilidade hanesan área parajen no saneamentu.
“Konstrusaun ne’e halo tuir saida mak durante ne’e sira mehi no husu ba Governu sentrál no lokál,” Eduardo haktuir.
Tuir ajenda ne’ebé TATOLI asesu, sekuénsia programa lansamentu sei hahú iha 10:30 Otl no sei ramata iha tuku 12:30 Otl iha-ne’ebé sei partisipa direta husi Xefe Governu, Kay Rala Xanana Gusmão.
Antes ne’e, iha tinan 2016 AMB hahú halo konstrusaun ba merkadu Tuanau ho totál ektare ualu iha-ne’ebé finaliza ona konstrusaun morru, uma ba fa’an sasán hamutuk unidade neen no ho tipu negósiu hamutuk 12.
Entretantu, projetu modernizasaun merkadu Tuanau iha Baukau tuir planu Governu sei aloka orsamentu hamutuk millaun $8-resin ho durasaun kontratu tinan-rua ne’ebé sei responsabiliza husi Kompañia Nasionál Suhurama Developer, Lda.
Jornalista: Natalino Belo
Editór: Xisto Freitas da Piedade
