DILI, 11 Fevereiru 2026 (TATOLI)–Delegasaun emprezáriu husi Mosambike, kuarta ne’e, iha hasoru malu ho Prezidente Repúblika José Ramos-Horta hodi ko’alia kona-ba oinsá sira hakarak investe iha Timor-Leste liuliu área dijitalizasaun.
“Sira-ne’e, ha’u-nia kolega de’it. Sira empreza husi nasaun Mosambike. Ha’u Embaxadór Timor nian ba Xina, maibé tanba ha’u ferias hela mai halimar iha ne’e, ha’u-nia kolega sira husi Mosambike hakarak mai halo investimentu, entaun ha’u fasilita sira atu hasoru ita-nia Prezidente hodi ko’alia no aprezenta sira-nia planu investimentu sira,” Embaixadór Timor-Leste ba Xina, Loro Horta, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Nia dehan, Timor-Leste agora sai ona membru ASEAN ho nune’e presiza duni investidór sira atu mai halo investimentu iha área saida de’it ne’ebé fó benefisiu ba Timor-Leste.
“Timor-Leste agora tama membru ASEAN, entaun iha nesesidade halo dijitalizasaun ba Ministériu, Universidade sira tenke iha ona sistema dijitalizasaun, entaun investór sira-ne’e hakarak atu investe iha área sira-ne’e. Ita presiza duni investidór sira, entaun sira ko’alia posibilidade halo kolaborasaun ho Governu Timor-Leste atu apoiu Timor-Leste iha dijitalizasaun,” nia dehan.
Aleinde hasoru Prezidente Repúblika, delegasaun ne’e hasoru ona Vise-Primeiru Ministru Mariano Assanami Sabino, Ministru Agrikultura Peska, Pekuária no Floresta (MAPPF), Marcos da Cruz, Ministru Planeamentu Investimentu Estratéjiku (MPIE) no Vise-Ministru Komérsiu Indústria Agusto Junior no asuntu hirak ne’ebé ko’alia kona-ba oinsá atu halo investimentu iha área dijitalizasaun sei deside iha Konsellu Ministru.
Jornalista : Hortencio Sanchez
Editór : Cancio Ximenes
