DILI, 11 Fevereiru 2026 (TATOLI)—Governu liuhusi reuniaun Konsellu Ministru, kuarta ne’e, aprova Proposta-Lei ne’ebé aprezenta husi Ministru Justisa, Sérgio de Jesus Fernandes da Costa Hornai, hodi kria Orden Advogadu Timor-Leste (OATL, sigla portugés) no ninia estatutu.
Ministru Justisa (MJ), Sérgio de Jesus Fernandes, hateten ohin nia aprezenta de’it proposta ida-ne’ebé propoin husi Ministériu Justisa kona-ba orden advogadu iha Timor-Leste.
“Objetivu prinsipál ida-ne’e atu bele regulariza advokasia tanba iha Timor-Leste regulariza ona kona-ba atividade advokásia nian tanba advogadu timoroan barak mak ezerse hela sira-nia funsaun nu’udar advogadu profisionál”, Ministru informa ba jornalista sira iha Palásiu Governu, ohin.
Aleinde ne’e, nia dehan, seluk tam maka ita atu kria kondisaun ida oinsá sira-nia estrutura bele funsiona ho di’ak. Hahú kedas husi Asembleia Jerál, orden advogadu para neineik-neineik konsellu jestaun dixiplina advokásia bele transfere nia aan ba iha orden advogadu, no parte asembleia jerál ne’e bele reuni ninia membru sira hodi halo desizaun ba planeamentu.
Tanba, diploma ne’e ho objetivu atu kria Orden (Asosiasaun) Advogadu Timor-Leste nu’udar asosiasaun profisionál públika, ne’ebé responsável atu regula asesu no prátika advokasia, reprezenta profisaun ne’e no define regra sira-ne’ebé aplika ba organizasaun, funsionamentu no dixiplina iha advogadu no advogadu estajiáriu sira.
Inisiativa ne’e estabelese enkuadramentu jurídiku (legál) ba OATL, define ninia atribuisaun, órgaun, kompeténsia no mekanizmu sira funsionamentu nian, nune’e mós prinsípiu sira-ne’ebé aplika hodi hala’o profisaun, hodi kontribui ba reforsu organizasaun advokasia no konsolidasaun sistema justisa nasionál.
Jornalista : Alexandra da Costa
Editór : Cancio Ximenes
