VIKEKE, 11 Fevereiru 2026 (TATOLI)—Prezidente Autoridade Munisípiu (PAM) Vikeke, Francisco C. S. de G. Soares, klarifika katak mudansa estrutura ne’ebé daudaun ne’e akontese iha Munisípiu Vikeke ne’e desizaun husi Ministériu Administrasaun Estatál (MAE).
“Mudansa estrutura ne’ebé agora daudaun akontese iha munisípiu ne’e ema barak rona ona tanba fó-sai ona iha Jornál Repúblika. Mudansa estrutura la’ós ita mak halo maibé MAE mak halo,” Francisco C. S. de G. Soares ba TATOLI iha nia kna’ar fatin, Kuarta ne’e.
Autoridade ne’e nota, mudansa estrutura dalaruma husi avaliasaun prelimináriu ne’ebé foin lalais ekipa avaliasaun husi MAE deteta.
“Ezenora no nomesaun ne’e la’ós ha’u-nia kompeténsia. Hanesan sekretáriu no diretór sira-ne’e ezonera no nomea husi MAE. Ha’u hatene balun la satisfás maibé ida-ne’e mak realidade. Ita prepara an ba desentralizasaun no poder lokál ne’e servisu tenke hatene, tenke rona orden superior sira,” Francisco subliña.
Nia dehan, sekretáriu no diretór sira-ne’ebé tama lista hamutuk na’in-hitu kompostu husi sekretáriu asuntu administrasaun no finansa no diretór servisu munispál na’in-neen (6). Estrutura foin sei simu tomada pose iha 13 Fevereiru 2026.
Baze legál husi nomeasaun mak karta Nú. 07/M-MAE/II/2026, fó-sai iha Jornál Repúblika iha 06 Fevereiru 2026, iha-ne’ebé nomea Sekretáriu Munisipál Administrasaun no Finansa, Diretór Sekretariadu Munisipál Administrasaun no Rekursu Umanu, Diretór Sekretariadu Munisipál Finansa, Diretór Sekretariadu Munisipál Patrimóniu no Lojístika, Diretór Sekretariadu Munisipál Edukasaun, Diretór Sekretaria Munisipál Asistánsia Sosiál, Diretór Sekretariadu Protesaun Sivíl no Jestaun Dezastre Naturál no Diretór Ajénsia Planeamentu Munisipál Autoridade Munisipál Vikeke nian.
Iha karta ofisiál ho númeru referénsia 138/GAB-PAM/VIKEKE/I/2026, ne’ebé asina husi Prezidente Autoridade Munisipál Vikeke; haree ba nesesidade atu asegura funsionamentu regulár ba órgaun no servisu sira Autoridade Munisipál Vikeke nian, tanba ne’e, tuir termu no kondisaun sub alínea i), alínea 2 artigu 4-A, alínea 1 artigu 71 no alínea 1 artigu 72, hotu-hotu Dekretu-Lei Nú. 3/2016, loron 16 fulan-Marsu, publika fali hosi Dekretu-Lei Nú. 34/2025, loron 15 Outubru, deside atu demite:
- José da Costa Sousa husi kargu Sekretáriu Munisipál Administrasaun no Finansa Autoridade Munisipál Vikeke nian;
- Luís Amaral husi kargu Diretór Administrasaun Munisipál no Servisu Rekursu Umanu Autoridade Munisipál Vikeke nian;
- Estevão Carvalho husi kargu Diretór Servisu Finansa Munisipál Autoridade Munisipál Vikeke nian;
- Antônio Amaral husi kargu Diretór Servisu Patrimóniu Munisipál no Lojístika Autoridade Munisipál Vikeke nian;
- Júlio Sacadura husi kargu Diretór Servisu Edukasaun Munisipál Autoridade Munisipál Vikeke nian; )
- Otaviano F. Salsinha husi kargu Diretór Sekretariadu Asisténsia Sosiál Munisipál Autoridade Munisipál Vikeke nian;
- Jeremias de Carvalho hosi kargu Diretór Servisu Munisipál Protesaun Sivíl no Jestaun Dezastre Naturál Autoridade Munisipál Vikeke nian;
- Carlos de Araújo Jerônimo husi funsaun Diretór Ajénsia Planeamentu Munisipál Autoridade Munisipál Vikeke.
Sira-ne’ebe nomeadu mak hanesan:
- Estevão de Carvalho ba kargu Sekretáriu Munisipál Administrasaun no Finansa Autoridade Munisipál Vikeke nian;
- Rui da Costa ba kargu Diretór Administrasaun Munisipál no Servisu Rekursu Umanu Autoridade Munisipál Vikeke nian;
- Carlos Alves da Silva ba kargu Diretór Servisu Finansa Munisipál Autoridade Munisipál Vikeke nian;
- Octaviano F. Salsinha ba kargu Diretór Servisu Patrimóniu Munisipál no Lojístika Autoridade Munisipál Vikeke nian;
- Antônio Pinto da Silva ba kargu Diretór Servisu Edukasaun Munisipál Autoridade Munisipál Vikeke nian;
- Antônio Amaral ba kargu Diretór Servisu Asaun Sosiál Munisipál Autoridade Munisipál Vikeke nian;
- Carlos de Araújo Jerónimo ba kargu Diretór Servisu Munisipál Protesaun Sivíl no Jestaun Dezastre Naturál Autoridade Munisipál Vikeke nian;
- Marcos Rangel ba kargu Diretór Ajénsia Planeamentu Munisipál Autoridade Munisipál Vikeke nian.
Jornalista: Vitorino Lopes da Costa
Editór: Xisto Freitas da Piedade
