DILI, 12 Fevereiru 2026 (TATOLI)—Autoridade Nasionál Komunikasaun (ANC) sei koordena ho Eletrisidade Timor-Leste (EDTL) hodi uniformiza fiu eletrisidade no telekomunikasaun ne’ebé dada trankadu iha kapitál Dili.
Prezidente Autoridade Nasionál Komunikasaun, Flávio Cardoso Neves, hateten operadór telekomunikasaun tolu ne’e halo sira-nia servisu ba rede internet no iha asuntu balun ne’ebé servisu hamutuk ho sira katak kada fulan sira tenke submete relatóriu téknika nian atu ANC haree hodi identifika saida mak mak presiza hadi’a.
“Fiu sira-ne’ebé dada dalaruma uza iha ai-riin eletrisidade nian entaun ne’e ligasaun fali ho Ministériu Obra Públika. Hanesan ita haree kabu rede nian dada besik ho fiu eletrisidade, entaun ita lahatene bele fó ameasa nune’e ba oin ita sei servisu hamutuk ho EDTL hodi buka mekanizmu. Tanba bainhira operadór sira uza fasilidade ida-ne’e signifika sira hetan autorizasaun husi instituisaun seluk,” Prezidente ANC ne’e informa ba Agência Tatoli iha nia kna’ar fatin, ohin.
ANC laiha kbiit atu kontrola to’o iha ne’eba, tanba fasilidade ne’bé sira uza husi ajénsia seluk nia responsabilidade, tanba ne’e dalaruma operadór telekomunikasaun sira atu dada kabu ne’e sira kontaktu EDTL.
Maibé, ba oin, Governu iha planu ona servisu hamutuk ho instituisaun relevante halo uniformiza dada kabu sira ho organizadu liután tanba asuntu ne’e ko’alia mós iha Parlamentu Nasionál.
“Ita sei haree hamutuk fiu sira-ne’ebé dada iha risku ka la risku tenke halo di’ak atu labele fó risku ba ema hanesan sirkuitu ruma. Entaun, ami tau asuntu ne’e hamutuk hodi koordena interministeriál, nune’e ema ruma atu dada fiu labele arbiru tuir nia hakarak de’it,” nia hateten.
Signifika, nia dehan, la presiza harii ai-riin ida-idak maibé importante mak tenke koordena no uniformiza fiu sira-ne’e, se lae fiu sira-ne’e dada hamutuk de’it bele hamosu problema.
Ministru Obra Públika, Samuel Marçal, hateten loos duni ida-ne’e mak asuntu ida-ne’ebé mak tenke haree, tanba fiu eletrifikasaun nomós kabu telekomunikasaun nian dada hamutuk no la uniformiza bele afeta sirkuitu no mós kria imajen ladún furak ba sidade.
“Tanba ne’e mak ami iha polítika ida hodi hakoi tiha liña eletrifikasaun nian husi rai-okos ne’e atu evita problema hirak hanesan ne’e. Entaun, fiu eletrisidade nian, fiu telekomunikasaun nian no kanalizasaun bee, ita dada no hakoi hotu iha rai okos, nune’e ita hare sidade ne’e bele kapas liután,” nia informa.
Vise-Prezidente Eletrisidade Timor-Leste, Júlio de Jesus Gonçalves, hatutan operadór telekomunikasaun sira balun mak aluga poste eletrisidade (ai-riin eletrisidade) maib sira mós fó espasu distánsia entre fiu ho metru ida mai kraik hodi monta fiu telekomunikasaun nian.
“Ami fó espasu distánsia ba sira hodi monta sira-nia fiu iha ai-riin eletrisidade nian ne’e husi metru ida tun ba kraik. Metru ida ba leten, labele monta se lae fiu besik malu bele hamosu sirkuitu,” nia dehan.
Nia afirma, Governu implementa ona programa hakoi fiu sira husi rai-okos, normalmente ba oin mak obra ne’e la’o kapaas sei haruka mós operadór telekomunikasaun sira monta sira-nia fiu iha sira iha rai okos.
Jornalista : Alexandra da Costa
Editór : Cancio Ximenes
